India ram, Mizoram ramkulh sung ih khuapi sung le lai khua lam ah acozah tlawng ah siseh, bulpak ih ong mi private tlawng ah siseh tlawng a kaitu kawlram mi tlawngta 6,195 an um tiah Mizoram Ramkulh Fimthiamnak minister cun a sim.
Tlawngta 6,195 lak ihsin 5,221 pawl cu acozah tlawng ah an kai ih 184 cu acozah ih bomnak pek mi tlawng ah an kai. A dang tlawngta 790 cu bulpak ih ong mi private tlawng ah an kai tiah theih a si.
Mizoram ramkulh ih Ramkulh Fimthiamnak Department Director Dr. H Lalthlangliana cun “Kawlram tlawngta tam sawn cu Chin mi an si ruangah tong thawn pehpar in harsatnak an nei tuk lo. Ziangah tile mizo ram thawn nunphung le phunhnam ih kan bangawk ruangah a si ih mizo tong khal an tong thiam” tiah a sim.
2021-2022 cazir kum ah Kawlram tlawngta 68 pawl cu phun 10 camibuai hrang cazin an thunsak thu khal Fimthiamnak Department Director cun a sim.
Mizoram ih tlawng a kaitu kawlram mi tlawngta hrekkhat cu raltlan an si ih hrekkhat cu kawlram ih tlawng kai a theih lo ruangah nu le pa in Mizoram ih tlawng an kai termi pawl an si. Cui’ leng ah tlawngta hrekkhat cu ramri kiangkap lai khua lam ih tlawngta nauhak pawl an si tiah theih a si.