Falam khuapi ah fang tel in zaran ei le in man pawl a kai vivo hrih lai ruangah mipi tampi cun ei le in nei lo in an um leh ding an phang ruangah cuh helh in thil an lei ciamco tiah Ayeyarwady Times cun a tar lang.
A hlan ih dip khat 47000 kiangkap a si mi Ayeyarmin Kawchiat fang phun pawl cu tu ah 72000 in lei a tul thlang tiah theih a si.
“Thlakhat hnu thlakhat thilri man hi a kai vivo. Fang man khal hi a sang vivo ruangah nehhnu ah ei le in a har thei ruangah a hlan ih fang pi 4, pi 5 kiangkap khop mi khalin an neih mi sumpai umsun suah in a dip in fang an lei ih an khawl ciamco. Sitii khal cuvek thotho in lei khawl ciamco a si ko” tiah Falam khuapi sung um nu pakhat cun a sim.
Falam khuapi ih fang le ei in pawl hi Sagaing ramthen, Kalaymyoe ihsin lak a si bik ih thilphur motor pawl zawhmi bik Kalay le Falam karlak doawknak a um phah theu ruangah feh sukso harsatnak a um theu ruangah thilri man hi tlak thei lo in a kai vivo a si ding tiah tualsung mipi hrekkhat cun an zum daan an sim ve tiah Ayeyarwady Times cun a tarlang.