Falam Charity Clinic cun tuini ihsin zaanlam ih mina zoh cu cawl hrih an tum ih zinglam 7:30 ihsin zohnak lawng an nei hrih ding thu tuanvo nei Dr. Steven Cung Sin Thawng Luai hnen ihsin theih a si.
Falam Charity Clinic cun zinglam le zaanlam ih damlo a lak ih zohnak an ral nei theu ih October 5, 2022 ni ihsin zaan lam ih damlo zohnak an neih mi cu cawl hrih in zinglam ih mina zohnak an nei theu mi cu a kel ten zinglam nazi 7:30 ihsin nei hrih an tum a si.
Falam Charity Clinic hi February 15, 2021 ni ah rak ongthok a si ih ram dinhmun thalo ruangih harsatnak tongtu mipi pawl in harhdamnak thawn pehparin tuamhlawmnak tha tei’ an ngah theinak hrang siibawi pawl le nurse pawl in tlawmngai in, a lak ih damlo zohnak an nei a si. Kum 2021 ah Falam Charity Clinic in an tuamhlawm mi damlo a mipum zawng in 2205 an um ih damlo tuamhlawmnak hi a zat in voi 5514 an rak nei thei. Tui kum (2022) ah January thla ihsin September thla tiang damlo zoh zo mi hi a mipum zawng in 2052 an si ih damlo zohnak neihmi hi a zat in 5187 a si zo tiah theih a si.