Salai Loyal
Nitleu mawite cu a rungeng ruangro. Paihlo cingte’n ka tho ih ti kabualttheh in thawhhlam ei in ka to. Ka thawhhlam cu coffee khuatkhat le buhkio engcercer a si. Inn hmai zaute ah to phah in ka thawhhlam cu ka ei rero. Cu lai fangah kan kawtkaa nu cu inn hmai tikawngte ah bel rawtin a buai rero. Zinglam nazi paruk pasarih hrawng a siih nikhua a dai lemlo in a hlumlem lo. Asinan kan kawtkaa nu cu a thlanhribaksentla in bel a raw thruhhro.
“Kawtkaa nu cawlhrih aw law ee, nathlan a nasatuk lawmmamtuk aw” tiah ka hei auh. Kan kawtkaa nu cun
“Kafa le pawl an thohlanah ti ah ka taima ta a si hi” tiin i run sawn. Kan kawtkaa nu cun fa pahnih a neiih a upa deuhtu cu kumli a siih a nauta deuhtu cu kumkhatttha a si. A upa sawn cu nunau a siih a nauta sawn cu mipa. Van siazet in a pasal in kandungthla ah mual a rakliam san fawn. A fa unau hnih thawn a bor a thlai in a buaipi ringring hi a siko.
A vorhlam ah a bel rawtfaiverver cia pathum a ret ih a kehlam ah a rawt laidingmi beldum riamriam panga a um lai. A rawt laimi cu a hrekkhat hrawnglawng a tthehih a tanglai mi cu belmang dumriamriam a rawtnak puansiadum riamriam in vutcam le fanghi kangthawn a rawt hruthro.A bel rawtlaimi belmangdum cu ka kut zaphak ihsin a kiutiang a luang. Cu ti’h a rawtrero lai ah a fapa cu tapthlang ih ttamu puan hnawhtak phahmi parih a pai hnisia thlek mi phah mi parihsi’n a hun au ruairo. A nau ih au awn ruangah a u nu cu a hung tthangve. A fanu cun ”Nu nu nau a tthang” tiin ringpin a nu cu aauh. A nu cu a kut kha tleuhttha man lo in a tlanduamdo ih a nau cu a vacawi. A belrawtlai mi cu tan in a fa le pawl hnenah a vafeh. A fa le unauhnih cu ti a bualter ih sinfen a thengsak. Cu tthehin thawhhlam a pehai. Thawhhlam a pekttheh cun nazi pariat a rakkim lala mai. A fanu cu a nau rak um ding in a cah ta.
A bel cu rawtsal lala. Belrawt a ttheh in ti a bualve. A hnipuan a thlengtthehfel in a fanu ih rawl ken ding a tuahsak. Cun a hnipuan a thlengsak. A fapate cu pawkpuan siahnephni te thawn a paw ih a fanu cu tualleng tlawng ah thlahding in a feh.
“Kawtkaa nu na fanutlawng na thlahzik maw” ti ah ka heiauh. A nihcun “aw siee. Nang the hnattuan na fehhrih lo ke maw” i run tive. “Tawkfang le ka fehke. Ka man deuhhrih lo” ka ti sal. An nufa thumte’n tlawng an fehtlang hleuhhlo. Keikhal cu sinfen kathlengaw ih hnattuan feh ding in ka tim ka tuah hmut hmo. Ka titheitawk in ka tlio rero ve. Ka tim ka tuahttheh in a leng ka vapawt cu kan kawtkaa nu cu a fapa pawphah in tual ih hnawm a raksam rero.
Hnattuan in ka buai rero. Ka hnattuan cu lei tlun ih buaibik ah ka ruataw. Cuticun zarhteni a hung thleng. Kan kawtkaa nu cu a damlo nasazet ih thotla a tho theilo. Sumpai an nei fawn si lo. A fanute cu kahnen ah ra in a nu in i koter thu i rungsim. Kan kawtkaatei’ inn ah cun ka vafeh. An inn sung kavalut cu a nu cu a rak besianasa. Kan kawtkaa nu cun “sungkhat le ka nei silo zangfahte’n i rak bawmaw. Ka fa le pawl rawl an ei hrih silo. Rawl le ka suansak thei fawnlo. Rawl i rak peksak theikem maw” mitthli tlaphah in zangfah i dil. Kei khal in ka e ta mai. Nazi ka vun zoh ih nazi pakua a rakkimzo. A fa le pawl ka zohlala ih an ttamsawl zik rerozo.
Zamrang theipatawp in ei-inn ka tim tuahsak. Kattheh in rawl ka pehai. Cun ti ka bualter hai. Ka tthehfel thluh in nazi ka heizoh cu sun nazi pakhat a rakkim man zo. Nauhak pawl cu ka it ter hai ih thawzet in an itthat hluthlo. A nu khal a thin a nuamthlang ih thawzet in a itthat ve. Zaanlam khal ah rawl ka suansak lala ih rawl ka vape lala hai. Kawtkaa nu cun lungawithu i sim rero ih thaizing khal ah bawmsal ding in zangfah i dilsal. A thaizing zarhpi ni ah cun ka buai nasa sinsin. Kan kawtkaa nu ih nitin a hnattuan cu voilekhat ah ttuanvo ka vun laksak. A hlan ih ka hnattuan ah ka buai nasabik tiih ka rak ruatawkmi tu ah cun ka hnattuanhnak ih buaithlak le hnattuan tam sawn ka ttuanti ka theiaw vurvo. Cu ticun kawtkaa nu ih ttuanvo cu karkhatsung hrawng nitin ka ttuansak. Kan kawtkaa nu a damttha salzo. Kei khal a hlanvek in ka hnattuante lawng ka ttuansal.
Zingkhat cu thawhhlam eiphah in inn hmaiah ka to lala. Kan kawtkaa nu cu a keltein buai emem in hna a ttuanve lala. Kei ka rak ttuansak lai ah rawlsuan; nauhak pawl rawlpek; tibualter; tlawngthlah; tlawnghmuak lawng a sinan ka bang nasazet. Kawtkaa nu vek in innsang hna tinkim ttuan ve betbet sehla ziang ha ka bang ding ti ka ruataw ban lo. Aw….. ziangkhal a si le Nu cu Nu a rak si cingcing ko.