Salai Loyal
Kan dung te ah “I ngai can a si le ziang na tuah ttheu” tiin i rak sut. Ziang ka tuah ttheu ti ka rak thei aw dah lo. Ka ruattthasal ngurngo ta.
“I Look Away”
A si. Ka lo mang caan le ka lo ngai caan ah bezai ka ngan, ttingttang tum in hla ka sak, lungleng hla ka ngai, ka lo ngainak thu pawl ca in ka ngan ti ka duh ve. Asina’n ka lo ngai can ah zianghman tuahlo in ka to ciocio.
Atuah cun ka lo ngai can ah to ciocio lawng in a ttha thiamthei nawn lo. Shower hnuai ih reipi tii ka ciahawk khal hi ka lo ngaituk ruangah. Zingtin Maamee ka ei khal hi ka lo ngai ruangah. Ka ihkhun kiang ih cabuai parih pangpar ka ret ringring khal hi ka lo ngaituk ruangah a si.
Asina’n ka lo ngai canah midang vek in romantic zet cu ka si lo. Kei cu Bazar ah ka feh. Ka lo ngaican ah tlangleng zin kiangih zing bazar ah ka feh. ( Monywa ih um Tlangleng bazar)
Tlanglengzin kiangih bazar cu bazar menmen a si. A danglamnak a um ciamco lo. Asina’n na duhbikmi bazar a si. Ocean hnak in na duh sawn. Ziangruangah na duhbik ti cu ka thei ve lo. Ka zum dan in khuate lam in an run zuarmi hanghnah hangrah tharhlam pawl le an thilzuarmi thianghlim tete pawl ruangah a si ding. Bazar kan thlen cun na inn ih thlengvek a si ko. Khuitawk hmunah ziangmi a um ti na thei ttheh. “Hi bazar cu sihte kua umnak tiangin na thei ttheh” ka lo ti tikah tisiamsi te’n i hnihsan. သံလမ်းစျေး na ti ringring ruangah keikhal ka rak သံလမ်းစျေး ve top a si hih.
A dik ko. Hih bazar hi a hmel zohvek a si lo. Thil leiding a kim in an tharhlam nasa. Aman khal a ol. I hruaipek ahcun ka uar zawng a si lem lo. A rei vivo ih keikhal cun nuam ka ti ve. Thillei duhmi kim te’n a um. Asina’n zing nazi (7:00) hrawngcun an thilzuarmi a cem ringring. Asina’n a feh a nuam ka ti.
A bik in nangmah thawn fehtlang a nuam ka ti. Ka umnak thawcun a naiawte na’n a umnak a thawn cun a hla nasa. Asina’n bazar fehding cun i ra sawm ringring. Thillei a ttul lo tiih kan feh menmen can khalah kutkhatpi in thil kan lei thotho. Curuangah kan feh tinte’n kutkham ding in ka ralring cia. Kan lei hngilh dahlo mi cu pangpar a si.
****
Tuizing khal bazar ah ka feh. Sa khal ka leilo. Hangnah hangrah khal ka leilo. Pangpar lawng ka lei. Nidang ahcun reiret theih mi pangpar ka lei ttheu na’n tui zingcu “Fresh cut Iris” ka hmuih lei loin ka um thei lo.
Kan rak leitlang ringringnak pangpar zuartupa in tutiang i thei lai. I tansan hnu khalah a hnenah ka lei ringring. Cu pa cun “make it last longer” i tiih pangpar reidaih ding in sii thawn retaw i ti ah ka rak ruat. Asina’n a mithmai le a umdan ka zohtthat tikah fala lemnak ding hrangih pangpar lei ah i ruat khi a rak si.
Nang na lei a si le cu Rose par senhlekhlek le a hmin ka theih lo mi a par fate zet varthianghlimte na lei theu. Rose parsen le a hnah hringhlerhli lakah pangpar var fate zet pawl cu an dak ih mi an bih ttheu. Na pangpar tthu mi cu mileng pindan cabuai, coka ah pakhat, cun ka ihkhun kiangih cabuai parah pakhat na ret ttheu.
Mileng pindan ih cabuai cu sangkaate a naihdeuh ruangah a si ding reilo teah an vuai ttheu. Curuangah TV parah i tthinsak ttheu. Cutikah TV parih ret cu a remcang zik lo ka lo ti a sile mileng pawl in an hmu thei thotho i ti ttheu.
Voikhat cu pangpar rong pawl(blue) na run lei.
” Tuisun na lei mi cu blue a si ual ” ka ti.
” A si lo Violet a si hi ” i ti.
” A bangaw ko ” tiin ka lo tiphah in na dungllam in ka lo pom. Na pangpar tuahlai mi cu na liangtlun ihsin ka run bih.
Pangpar pawl cu an mawituk ti in a daih lo. Areihlante ih an lakmi a si ding. An tharhlan nasa. Apar cu senhripar thawn an bangaw zik. Akung cu thitsapan vek a si. A parhtuk hrihlo mi a par note pawl. A par sunglam ah cun aihre rong deuh nawn a si ih a lenglam ah cun violet rong. An mawi nasa. Relmenin an mawinak hi relfiang theih a si lo.
Khami zaan ka tthanghoi ih ka mit ka men le vete’n ka ihnak kiangah mawizet ih a par mi pangpar mawite cu ka hmu. Thin a nuam duh nasa. Hipangpar hi keimah hrang liolio ih in tthusak mi. A mawite theibik ih i remsak mi a si. I tuahsaktu parah ka lungawi ti hnakin ka lungawi sawn. Ka phone ka la ih “I Love you” tiin ca ka lo kuat. Seen a tiawk vete’n ” me too ” i rak tive. Na manglam in i kuat cu a si ziklo.
Ka lo pom phah in mizaan ih na tthu tami iris pangpar cu ka zoh. Cun tukverh ihsi’n a leng ka hei cuan. Ka manglam maw ka khawruahnak men a si ti ka thei awlo. Na theih loin ka mitthli cu a mahte’n a rualrual in an luang. Khamtheih a si lo. Ziangruangah ka mitthli a luang ti ka thei awlo.
*********
Tuizing iris pangpar inn ah ka tlunpi ih ka rualpa in mangbang in i zoh hiahia.
” Na duhzawng a si maw violet rong “
” Violet a si lo biida rong a si kha, Sii thawn an tuah sal a si kha “
” An tuah cop mi a si lo, a mah original si, Iris par an ti “
” Hi pangpar hi iris par an ti ” ti i sim laiah
” Cucu hla pakhat ih hmin a si kei cu” ka lo ti. Asina’n Goo Goo Dolls ih Iris hla cu na thei dah lo. Ka lo ngaiter ding ka ti a sinan ka theih hngilh pang.
Zingkhat cu haa ka tthuah phahin facebook ka zoh ih ka rualpa pakhat in Goo Goo Dolls
hla a post mi ka hmu. Ka phone cu Bluetooth songbox thawn join cia a si ruangah hla cu innsungah ringzet in a on. Culaifangah ka inn sungah na ra lut ih tukverh in innlenglam zoh phah in na ding ciocio. Na hmai ka lo hmuh theilo ruangah lo zohfiang ka tum. Na rak ttap. Ziangruangah na ttap.
“Ziang na cang?” tiin thinphangzet in ka lo sut. Zianghman i sawn lo. Ka thei sal. Mizaan na ngol ta kha. Ka lo lem rero nan ka lo lem thei lo. Zinglam pathum lai tiang ka lo lem theilo ih ka rak itthat ngah.
Hla sungih a tel mi “I give up forever to touch you..” timi catlang kha a danglam zawng in na rak la ih si. Hla a posttu parah ka lungawi ka ti ding maw si.
******
Hiti a si ding ruangah maw ka mitthli a raktlak ti ka theisal. Zaan thlapa a suahcanah na zohtheinak ding hrangah meero pawl ka lo sialsak. Thlapi a umlo canah na hrang arsi sithei ka rak zuam. Asina’n a cangthei lo cu a sibik hi. Thlapi cu mawizet in a suak ttheu na’n thlapi hawlhmuh theilo can khal an um ve. Arsi khal a danglam cuanglo. Nikhua a tthatlo cun hmuh an theihlo. Pangpar khal a hungpar ih mawizet in an par. Asina’n a vuaisal ih an ziamsal ttheu. Minung khal nui’ pumsungin kan suak ih kan thisal ttheu. Ziangziangkhal a hmunmi a umlo. Tuini ah an um ih thaisun ah an hlosal. Hihi thudik cu a si. Zohmanin kan hrial theilo. Nangkhal kandungte ah ka kiangah na um ih tu ah na hlosal. Ziang kan ti ttha.
” Na pangpar cu hun tthu aw he. ” Ka rualpa ih ttong cun duk tiin i harh tersal. Mangman laimi tthang dukdi vekin ka harh dukdi.
Ka rualpa cun pangpar cu mawi a ti zet. Mileng pindan ah kan tthu ding a ti.
” keimah ka rak tuah mai ke”
Nangvek cun mawizet ding in ka rem thiam ve lo. Pangpar mailai ka la ih ka ihkhun kiangah ka tthu. Zaan ka it zawngih thla ka cam tinte’n pangpar zoh in na hrang thla ka lo camsak. Zing ka tthang vete’n pangpar zoh in “Morning” ka ti. Mi aa tak cu ka si ko.
Pangpar zohphah in keimah te’n ka ttong ringring. Hi pangpar pawl an vuai ttheh a si le bazar ( Tlangleng Bazar) fehin a thar ka leisal ding. Iris pangpar a umsung cu ka lei ringring ding. Bazar ih a um nawnlo tikah a umnak hmun hawlin ka leisal ding. A ttulcun leilungpi helin ka hawl ding. Cun iris par zohphah in pangpar hnenah ka lo ngaithu le ka lo duh thu ka sim ding. Ka thih hlan tiang.
********
Thu pakhat ka lo suh ve duh mi cu tu fangah hin nangteh i ngai ve maw?