Salai Loyal
Thlatang rim namte cu theihthei a si nawn lo. Sak le thlang, a suk le a so theilo in Monywa khuapi ah cun a va thleng. duhdawt mi sungkhat unau pawl tanta in hmundang ih a feh voikhatnak a si bangin Van Van cu a lung a lengzet. Ziang aw titha, fimthiamnak hrang zuam a tul si.
A thaizing cun tlawngpa dingin tlawng inn lam pan in a pok suak. Hotel san man a tam ruangah asaung san ding hawl a cem tum phah. First Year a si vekin mi theih tla a nei lo. Kyuhkaa lamzinpi kiang ih um Honey Riakbuk ihsin poksuakin Monywa University lam panin laivaidipte pai phah in a feh rero. Cutin a feh phah rero laiah a dunglam ihsin tong pakhat a thei. “ Hi pa cu Laimi a si tengteng ding, a vaidip pai mi in ka theithiam,” “ aw ee, a situk ding, a feh daan hrimhrim in a at hmel,” ti’n fala pahnih in Kawltong ih an tong rero a thei. Zianghman theilo vek in a feh kel in a feh rero men.
Lamzinpi khatlam veve ah Kuukuh kung tum pipi in an khat. Cui Kuukuh kung lakih pakhat parih ca an tarmi a hmu. “ Pwintlin Amyothar Saung ” timi a si. A hmuh le veten a thinlung in tlawnginn thawn le a naih aw ih a rem ding ti’n a ruat. Cun ruatbet lemlo in cui asaung lam pan in a feh hmuthmo mai. Cutawk ih um dingin asaung hmu thawn an relih thlakhat ah 20,000Ks- a si ding tiin an rak ti. A dang hawl ding le a hrangah a harsa fawn ih a ee ta mai. Cun Honey Riakbuk ta a thilri la dingin asaunghmu thawn an feh. Cun tlawngap dingin a poksuaksal lala ih Kyuhkaa lamzin par ah a feh suaksal. Cun Monywa University hmai ih um Myiang Taung Di Bar dawr ah thiltul mi tete pawl a lei ta ih tlawng cu tluangten a ap thei.
Tlawng an run kai thokih F.P.T.P Monywa hruaitu pawl tla an ra thleng kim thlang. A hna a ngam nasa. Feb. thla a rungthlen cun an Class sungih Yati cu a thupten a uar. Yati cu a mawi ih a sam dung lam ah a ten, cun a hmailam malte a thlah. A hngawng a sau deuh nan, zoh a mawi tawk. A hmai cu hlai tuk lo a si ih a mit hmul dum tak le a mit mu mawite pawl cu zukneng mitmin bang tuk a si. Yati cu a san lam 5’6” hrawng a siih zoh amawi ngaingai. Hmel le tha, ca le thiam, pian le mawi Yati cu Van Vuan in a zoh khop thei ta lo aw.
Nikhat cu Van Van in Yati ih kiangah va fehin tongpi a va tum. Laipa, suah ihsin Kawltong hmang dah lemlo pa cun Kawltong in fala a biak zik a si cu. Yati cun a rak hnih san ih Van Van khal in a hnih san ve. Van Van in a vun biak ih a Kawltong a theihthiam lo ruangah a rak hnih san men. Cun cui Kawlnu cun hmuhsuam nautat tak in a rak sawn. A si nana Van Van a thinlung a thleng cuang lo.
Cutin Yati thawn an komaw ringring ih Yati in paisa a tul tinten Van Van hnen ta a la. Cun nazi cu ni in, ni cu thla in, thla cu kum in a rei vivo. Yati paisa a tulcan ih Van Van in a rak neih lo a sile a cahsak. A Nu el paisa an remcang lole a thinheng in tlawng ka bang ding ti zawng in a ti. Cu ti cun kum ( 2 ) sung an um.
Cutin an umsung hmuahhmuah rakzoh in rak thei thehtu cu “ Suite ” timi nu a si. Suite cu a mawituk ciamco lo nan iang a nei. Duh a nung. Cun tong lemlo mi daite a si. Ca a zuam ih cathiam lakah a telve. Tongtam a silo nan Van Van thawn an tongawk can ah thu a sim ringring. A thu simmi Van Van in zianghman ah a siar duhlo. Hnaset a tun men. A thu simmi khal Van Van ih a theihlo mi Yati ih thuhla a si.
Yati cu a tulhei tinten Van Van hnen ah a feh. Bawmnak a dil. A sinan Van Van ih theihlo in tlangval dang a rak nei. Cui thu cu Suite in a rakthei ih Van Van a sim. Van Van cun zianghman a ngaihsak lo. Ka mit ih ka hmuh le ka hna ih an tong ka theih lawngah ka zum ding tiah a ti. Cun Van Van ih a theihlo mi pakhat um lai mi cu Suite in a duhtuk ti hi a si.
Kum ( 3 ) nak an ra kai leh thlang. Van Van cu Falam pawlkom khalah a tel cuang lo. Kawltong thiam lo mi hmuhsuam le hnihsuaksai nak ding tawkfang ten Kawl pawl lakah a um. Suite cun Van Van ih thatnak ding in a zuam rero. Voikhat cu Van Van in “ Ziangah hitin ka hrang ih na buai ciamco. Nang mahten daiten um men aw. Fala ka nei zo. ” a ti. Suite cun “ Na hrang ka lo duhsak ruangah.” Ti lawngin a sawn.
Van Van ih rualpa Cungte in “ Van Van…. Suite in a lo duh tihi na thei lo maw? ” tiah a sut. Van Van in “ Thei ee, theituk lam, nan…… fala ka nei zo.” Tiah a ti. “ Sile, Yati in ka lo duh ti’n a lo ti dah maw? Voiziat na hrang tha ding a tuah dah? Na paisa a duh caan lawngah a lo mang a si lo maw? ” ti’n a kawk. Van Van cun kam khat te lawng a sawn. “ Duhdawtnak si khat.”
Voikhat cu an rualpiza in zaan vak in an pawt. Van Van cu phurtuk lemlo in a thlun ve. Zaan an vak ih nunau asaung pakhat hnu pakhat feh in hla na vasak. Cun “ Moe Tauh Paan Saung ” Yati ih umnak asaung an thleng tikah Van Van cu phurtak in hla a sak. Hla pahnih an saktheh ah hawikawm a thiamnak ah mipa hnih umvek in an hmu. Van Van cu a hlasak a phurtuk nak ah a thei velo. Hla pathumnak a cem in Van Van cu a zun a pah ih zun thawh dingin hawikawm a thiamnak lam ah a va feh. Rin lo pi ih a hmuh mi thil ruangah a tuk a sum. A mang a bang.
Kum ( 3 ) sung duhdawt zet le duatzet ih a rak du mi Yati, tlangval dang tangah bek in duhdawt nak parmawi an tlanaw. Van Van ih thinlung sungah tek a tla. Ling a hnin. Ralpi vei ( 3 ) nak a tho. Ziang ka tuah ding ih ziangtin ka ti ding ti a thei awlo. Yati cun “ Van Van, ziang na ra tuah? ” ti’n ningzat lemlo in a sut. Van Van cun ziang hman sawnta lo in a kirsal. A thinheng tuk ah a zun hman thawh ngah lo in a kirsal.
A rualpi pawl hnenah zuu kan in ding a tiih zuudawr lam pan in an feh. Zuu in dahlo Van Van, zuu in a tum ve. A mah in a do bet lai ding. Aw……. Duhdawtnak minung thinlung na thlnegter thehthei si lo sawm! “ Black pakhat. ” an tiih an vun cah. Vokhat an thlet ih Van Van cun “ Ka lo ton hmaisabik hrangah ” a tiih voikhat in ah a in theh. Cun an thlet leh ih “ Ka rak attuk man ah ” a tiih a in theh lala. Cu theh in “ Ka lo rak duhtuk man ah ”, “ In bum man ah ” ………… a ti ih taw le lu thei nawnlo in a in. Lamzin ih a tong mi hmuahmuah uico hman tanglo in hro a suang, a va sual vivo. Midang zuuri pawl in, um thei lo in an rak velh neknek. Mithi ret in an ret.
A thaizing tlawng feh ah Cungte in a hmuih, “ Hi cu Van Van a si lo sawm?” tiah a vun zoh fiang. Hmaithi theh in a um ih zianghman tla a theilo. Cungte cu lungphang in F.P.T.P hruaitu dang pawl a phone ih siizung ah zamrang ten an ret. Cui thu cu Suite in a theih veten siizung ah a thlunve hngal. Mi pakhat hnu pakhat ih rel nak in Yati tla in a rak theive, sinan theilo vek ten a um san.
Siizung ah kar (1) a um hnu ah Van Van cu a lung a fimsal. A kiangkap a zoh ih Suite in a kut kai phah in itkhun parah lukun in a it a hmu. Nazi a zoh ih zinglam 2:00 a kimzo. A kiangkap a zoh tha ih Cungte, ( F.P.T.P Hotu ), Hruaite ( F.P.T.P sungtuan ), Lualuai ( F.P.T.P, Hotu sang ) le Suite ( F.P.T.P Sumkil ) pawl a hmu. Tho a tum ih a vun tang. Suite ih a kut a rak kaihsak ruangah a kut a cang le ve in Suite cu a thang.
“ Van Van…….. Van Van…… na thangzo maw? Na lu a zinglai maw? Ziangtin na um lai? Na thinphang hlah kan zaten kan lo umpi hokhaw. ” tiin lungawi le a mah ngaihsak zetin a ti. Van Van in “ Tu khui nah ka um? ” tiah a sut. Suite cun “ ——- ah.” Tiin a sim. “ Ziang ka cang? ” tiah a sut. Suite cun a thok ihsin a cem tiang a simfiang. Cun Suite in “ A sinan, tu ah Cungte ih zarah sizung ah kan lo fehpi lohli thei ih a lungawi um, na dam thasuak thei sal.” Tiah a ti. Suite ih tong a ringtuk ih mi dang pawl khal an thang theh.
“ Van Van na tha thlang maw?” ti’n pakhat hnu pakhat in an sut. “ To ka duh. ” a tiih an to ter. Cun Van Van in “ Yati…… Yati teh?” lungphang le seherh aw in a sut. Cutikah Suite cu a mithmai a sia. Cungte in Suite a mithmai a sia a hmuh tikah, “ Van Van….. na Yati cu ee, dak khat kha a ra dak lo. Siizung na um le um lo hman a thei ziklo. Siizung na um thok ihsin tutiang Suite in tlawngkhal kai lo in sun, zaan a lo kil. F.P.T.P zate in thleithlak in zaan kan lo riakpi. Yati le na duhdawt zet mi na kawl pawl cun paisa 50Ks- te khal in an lo ra veh lo hokhaw. Fimthlang aw, na aa tuk.” Tiin thinheng in a kawk ciamco. Van Van cu a mitthli a tla ih “ In ngai thiam uh, ka lo telpi dah lo nan in buaipi rero ih, in ngaithiam uh.” tiah a ti. “ Cun Suite, na parah ka lungawi tuk. Ka lo duhtuk.” a ti. Suite cu ningzak in ek inn ah a lut. Cutin Van Van cu a fim ngah ta ziar. Hruaitu hrilawk nak an tuah ih Van Van cun Hotu sinak a ngah.
A hmai kum tlawng an ra kai ih Yati cu theilo vek in Van Van in a um san. Yati cun Van Van ih thatnak a thei sual ih ngaithaim a dil rero sal nan Van Van in “ Fala ka nei zo.” tiah kamkhat te lawng a sawn. Kawltong cu a thiam ngaingai thei cuanglo ih Kawl pawl ih hmuhsuam cu a tong lai thotho. A sinan Lai mi pawl lakah hruaitu a si vekin upat a hlawh zet.
Cun Chin National Day a rung thlang. Lam nak dingah rua an hai ih, lei dingin dawr a hawl. Rua kha kawl in ziang ti’n an ko ti le a thei lo. Dawr nei tu hnen ah a phunphun in a sim nan an theithiam thei lo. A bei a dong ve thlang. A to ih a hnuai ih lei a thu fai. Cun rua zuk a suai ih “ Hi vek ka lei duh.” tiah a sim. Cu lawng ah a lei suak thei. Cuti cun Cerithlawh tla nuam le hlunghlai zet in an lam suak thei.
Van Van cu Laimi hrangah pumpeaw in a tuan vivo ih tlawng a theh hnu khal ah a ti theitawk in a tuan. Kum
( 10 ) hrawng a rei hnuah Suite thawn fa nunau ( 1 ) le mipa ( 1 ) neiin Hluattaw ah MP a cang ve thei. Hlan ih a kawltong thiamlo ruangih rak hmuhsuam rero tu Kawl pawl ih hnatuan ngah duh ah an ra leng rero. Cui lak ah Yati tla a telve. Cun tlawng a rak kaidahnak F.P.T.P Monywa cu kum ( 15 ) a kimve thlang ih Jubilee an tuah nak ding ah ting ( 5 ) a rak hlu ve.
Lai ( Falam ), a miphun hrangah hlawhneilo in a rak tuan ih a miphun in a cawisang. A miphun in a cawisang ih a miphun a cawisang tu ah a cang. Lai mi ka si tiin Kawlvai pawl lakah cawisang sinsin in cungsang sin ah Lai mi a cawisang ih sangsin leh ah a cawisang. Vairang pawl iangin cungsang sinah Laimi a cawisang. Duhdawt nak dik le tlamtling cu kan sung ah le kan mah lakah a um ti khal a theisuak ta riai.