The Rihli Voice
December 9, 2022
Bangladesh ramsung buainak ruangih himnak hawl in India ram, Mizoram lam a ra pan tu Bangladesh raltlan pawl cu hramlak ih ti le rawl lo ih can reipi an hmman hnu Mizo Student Union in Parva-3 khua ah an va hmuak thu theih a si.
Raltlan ih raluttu pawl cu ti le rawl lo ih caan reipi an um ruangah a then cu an taksa cau in, an dinhmun a thatlo ruangah hardamnak lamah checkup nak neih cih an si.
Himnak lam pan ih an tlannak ah India ram Boder Security Force in an rak kai ih kutthlaknak, an neih mi pawl an lon sak ruangah eiin ding nei lo ih thih ding hnak in tin minung 90 lenglo pawl cu an ram lam an pan sal ih, an pannak lamzin ah piitar pakhat khal a thih phah.
Hi thuthawn pehpar in MSU cun poi an tiih, BSF pawl ih an tuah dan pawl hi kan zoh liam men lo ding tin an sim. Raltlan ih a ra tu pawl cu MSU in acozah tuanvoneitu pawl hnen theihternak pek cih an si.
Tui dinhmun ah Bangladesh ihsin himnak hawl ih tlan minung 800 lenglo cu ramhnuai ah an um lai ih, himi pawl khal Mizoram an thlen theinak ding lamzin hawl in kan buaipi ding tin MSU cun an sim.
Mizoram, Lunglei District, Parva 3 ah raltlan minung 310 an um ih tuini tiang Mizoram acozah in rilrawng le thlaphannak um lo din ih an zoh khennak par ah MSU an lungawi thu, Chin National Organisation (CNO) khal in sumpai thawn raltlan unau pawl bawmnak an pek mi par an lungawi thu MSU cun an sim.
Source; DMDNZ