The Rihli Voice
Media ih khihhmuhnak ihsin hloral in Manupur a cozah cu ramkulh sung a hleice in tlangtluan ah rittheihsii le danlo ih bing cin nasaten khamnak an nei a si.
Bing cinnak khamnak ah tlangpar khua in khawlak pa 5 telin zatekom 703 an kai ih bing acre 400 luan an siat thu tuanvo neitu in a sim.
Danlo ih rittheihsii zuarnak hlei ah manipur pengpi pa 5 ah Ukhrul, Senapati, Kangpokpi, Kamjong, Churachandpur le Tengnoupal ah bing cinnak hi buainak tumbik a si.
Bing cin cu Morphine telin rittheihsii tampi suahnak ih an hman ruang ah mi tampi hrang ah sum ngahnak hrampi pakhat a si.
Biren Singh acozah ih hmaisabik kum 2017 ihsin 2022 kumsung ah Manupur palik telin dan thuneihnak agency pawl in tlangtluan hmun pawl ah mi tam in danlo ih an cinmi bing acre 18,000 hrawng an siatsuah.
Mai duhnak vek in hriamhrei kailo ih bing cingtu pawl cu palik kaihnak in luatnak an ngah ding ih an cinmi thapetu pawl cu daan vekin an zizu ding tiah Mr.Singh in media ah a sim.
Manipur ramkulh ah rittheihsii umlo mi ramkulh si ding in an cozah cu hngetzet ih ding in manipur pumpi tlangpar hmun pawl ah danlo ih bing cin khamnak an tuan rero thu a simbet.
A cozah ih hramthoknak cu nuntu khawsaknak pawlkom kakip ih mipi pawl in an lungkim ruang ah rittheihsii khamnak cu thatnak hrang tumtahnak thawn hlawhtling zikte dinhmun ah a um tin Mr. Singh in a sim.
“A tu ah cu rittheihsii khamnak hi mipi pawl ih cangvaihnak pakhat ah a cang. Manipur rittheihsii umlo ding hmuitinnak thleng ko kan feh ding” tin Mr Singh in a sim.