Khaw 7 do hnak in inn hnen do a har sawn
Editor Anka
Kan pupa tong thim kan neihmi ah Khaw 7 do hnak in inn hnen do a har sawn an ti. Inn hnen thawn huat awk le khaw hnen thawn ral awk a har zia pitling pohpoh cun kan thei thluh ko. Inn hnen thawn huatawk le phei cu zing thawh ve te’n khal an hmel hmuh, leng suak duh khal le kawtka lam ih suah paih lo ah huan car lam ihsin hel kurko, a har fualfo awm tuk.
Mi inn hngak theu pawl cun inn hnen that a thupit zia kan fiang cuang ding. Inn san ding hawl tikah inntek an tha maw, veng hnen pawl teh buai hmang an si maw, veng thianghlim a si maw tivek zoh phah in inn san ding kan hawl. Ziangtluk in inntek tha khal sehla veng hnen ah nupa to aw hmang an um khal ah mah ah a rak nuam aw lo thei zet.
Inn hnen le veng hnen pawl cu kan duh tiktikah kan thleng thei. Inn dang kan cer ding. Khawdang ah kan vaih san thei. Sinan ram hnen pawl cu ziangtik hman ah kan thleng thei lo. Falam peng hi Thailand ram ah kan thawn thei lo, Lai ram hi USA ah kan hei phur thei lo. Curuangah tui’ kan peng tlang kiang ih um, kan Lairam kiang ih um pawl hi kan tesin falang tiang kan inn hnen an si ringring ding.
Na inn hnen thawn nan buai tikah ziang ti’n na tifel? A dam zawng in maw? Thahrum hmang in na cingfel? A tam sawn cun “keimah ka ti palh” ti’n rualremnak an tuah cio. Ziangah tile cucu mi pitling ih thil ti dan a si. Hrekkhat cu hriamhrei thawn an tifel tum ih sungkaw za, tek sa darh in an um thluh. Khat le khat thih tiang be aw thei nawn remrem lo in an um. Thahrum hmang ih thil tifel tum pawl hi an nun ah lei thlawsuah an dong lo thei zet. Zatlaknak in a nen ringring.
Hihi tu lai kan Falam peng boruak le kan Lairam dinhmun a si. Falam peng sung kan zoh asile mi ziang siar hmel lo emem le Saipi hnakruh deng kiak ding khawp ih tongkam thlahdah kan tam tuk. Hriamhrei kan kai cio ih kan lungkim lonak hmuahhmuah hriamhrei thawn kan tifel tum ahcun kanmah riangri ralhrang kan si ding. Bawi Jesuh khal Peter hnenah a sim kha hriamhrei a rinsantu cu hriamhrei in an thi ding a ti. Zo cio kan kut ah hriamhrei tihnung um zetzet kan keng hai ih kan tongkam kan thlahdah a tha lo. Ralring te’n pacang zet ih tong ding kan si. Hriamhrei thawn kan thinlingnak kan tifel tum ahcun biakbairok khua a tlai ding.
Kan peng hnen pawl khal kan hua thei lo, ral ah kan can aw thei lo. Ziangah tile kum khua kan umpi dingmi an si.
Mipi lam ih tuanvo kan neihmi cu kan mah le pawlkom ah online ih awkam hrang le tong thlahdahmi kan hotu hrekkhat hi nun kan sim cio pei uh. CNO hotu lakah tongkam thlahdah an um le Falam milesa pawl in nun sim ding. Midang pawlkom hotu lak ah tongkam sia hmang an um le mai’ hnarhri thunmi ciar nun sim sehla. Cuvek lo ih midang hotu kan va ti sakawk le kan hua hleuhleu si. Mah le hnarhri khitmi ciar mipi in kan khawng thei a tul. Ziang tik khal ih a dik ringring dingmi cu SAC siar lo mah le mah kap aw lo ding, thisen kan suah aw lo ding timi hi si. Kan kap aw pang ih thisen kan suahawk pang cun tesin falang tiang a rahsia kan tel ding. Cumi khamnak ih thupi mi cu hotu pawl tongkam sia le tursia hi kan nau le hnen ah kan tuh lo ding a thupi. Kan tong kan fimkhur a thupi.
Netabik ah Chin ram thawn peh aw hi Mizoram, Bangladesh, Sagaing, Magwe le Rakhine ram pawl an si. Hi pawl thawn ziangtik hman ah kan ralawk a ngah lo. Ziangah tile ziang tik hman ah kan thleng thei lo dingmi kan inn hnen pawl an si. Buainak kan neih hman ah a nem zawng ih ti fel kan zuam a tul. Tu lai ramkhel thli lengvak men le caan rei hrang a hmun dingmi thuhla hi mah te’n khaikhin thiam uh si. Mah thazang cakter duh ruangah midang va huat zirh vivo tla hi midang an lungfim tik ah mualphonak a si. Ral neih tam maw kan duh, rualpi neih tam kan duh timi hi nunnak neitu pawl an dam khawsuahnak ding ah thil thupi zet a si. Ziang a va si khalle rualpi neih tam duh sawn uh si. Ruh a nei lomi kan lei kilkhawi tha uh si.
Salai Lian Pi