Lebanon ram ih khawlipi a simi Beirut khawpi tlanglei kehmun khuarnak pawlah Israel lamin vanzam thawn va do ih cu mi cu Hezbollah tarket pawl kan kapmi a si tin Israel ralkap lam cun a sim. Hezbollah militants pawl khalin voi le khatih Adaisseh khawpi lut tumtu Israel ralkap pawl doawknak kan nei a si tin a sim ve.
Israel cu Iran in Missile thawn a kap thu telin khat le khat karlakih eltaiawknak sosang mi thubuai thawn pehparin United Nations Security Council cun October 02, 2024 ah tonawk thurelkhawmnak neih an tum rero lai ih hivek doawknak cang peh mi a si.
American Defense Minister Lloyd Austin cun Iran in an va rak kah hmaisat mi cu natak in a dem ih, hi tivek hi neta ah tuahbet citcet nawn lo hram dingin Iran leh Iran ih a bawmbawihmi militant group pawl cu a dil hngal. Cun american dinhmun in Israel siseh nisuahnak lam laifang ih um american ralkap pawl siseh Inn hnen ram pawl leh an mah thawi interests pawl cu kan kilhim vivo ding tin minister Austin cun a sim bet.
Israel prime minister in himi doawk buainak hrang mawhphurhnak cu Iran hruaitu pawlin an la ding tin ralrin nak a pekih, online parih kan hmuh rero mi videos zuk pawl ah Iran in a va kapmi missiles cu Israel sung ih a tlak hlei ah inn hnen Jordan ram sung tiangkhal a va tla a si a ti. Himi ruangih mithi zat tivek cu an tarlang hrih lo.
Iran President cun himi cu ram le rammi pawl kan humhimnak a si timi leh kan nih Iran cu mi va do ngiar hmaisa tu ram kan si lo nan, hringhronak zaten raltha zetin kan dolet a si tin Online parah a ngan ve a si.