Ram pumpi ah eltaiawknak a so sang rero lai ah, ralhrang cun rampi hrilawknak hrang vote kimcang ngah theinak ding hrang tin phuahhlam hawlin mipum siarnak a nei thok thlang a si. Yangon khawpi khalah ralkap le palik pawlih security laknak hmun mipum siarnak an neihnak ah cun bulpak thuhla siseh ramsung ramleng an veivahnak thuhla tiang leh thusuhnak 68 telmi Survey thawn inn khat hnu inn khat an tum an kai ih nazi 7:00 A.M ihsin 6:00 P.M tiang cazin cipciar an la rero. Cumi ker kawm ah ralhrang cun ralhrang tuan ding in an kawhnak rak hrialtu le miphun hriamkai pawl thawi a țangkoptu zo pawl an si ti phorhsuak an tum a si tikhal zum a um zet thu an veivak nak kiang ih rak um mipi in an sim.
Himi thuthawn pehparin Miphun hriamkai pakhat a simi Chin Brotherhood Alliance cun hivek in ralhrang in rampi hrilawknak hrang tiih mipum siarnak an neih mi hi diklo zetih an mai thuneihnak caan a sau theinak hrang an tumtah mi a si ruangah Chin Brotherhood dinhmun in kan pom lo a si. Cun zohman khalin telpi lo hram cio ding ah leh a teltu pawl cu Effective action kan lak ding a si tin ralrinnak a pek ih, cun KNU lam khalin dik lo zetih thuneihnak latu ralhrang pawl hin politics vek tei Legitimacy ngah theinak hrang an zuam rero mi a si tin an sim ve.