Kutkholh Thu (Hand Washing)
Nat hnu ih tuamhlawm-awk ciamco hnakin a hlankhan ih kham-awk thiam a tha deuh. Cutiih kham-awk daan phunphun sungin kutkholh hi a thupizetmi pakhat a siih sumpai tampi cem loin tuah ol-samzetmi a si. Kan kut ah mit ih hmuh theimi baal pawl le mit ih hmuh thei lomi nathrik pawl tamzet an um.
Kutkholh hi mai hrang lawng si loin kan kiang um, kan sungkhat le rualpi pawl hrang tiang thathnemnak tampi a suahter thei.
Kut baal ruangih a cang theimi nat pawl
1. Pumlam thawn pehparmi nat (Thimnak; Sungdok nat)
2. Thawthawtnaklam thawn a pehparmi nat
3. Taksa vun thawn pehparmi nat
4. Mit thawn pehparmi nat pawl le
5. A dang a suan-awk theimi nat pawl an si.
Ziangtik caan ah kutkholh a tul
1. Ei-in timlam hlan le timlam hnu ah
2. Rawl ei hlan le rawl ei theh hnu ah
3. Hnatuannak asilole mi tampi umnak hmun ihsin tlun tikah
4. Siizung, siikhan ihsin tlun tikah
5. Dam lo tuamhlawm hlan le tuamhlawm hnu ah
6. Zin/ ek tlan ttheh tinten
7. Naute suak pek le nat tihnung (suan-awk ol)nei pawl tham hlan le tham hnu ah,
8. A tlunlam ih tarlangmi pawl le a dang nat suan-awk thei dinhmun ih um caan ah.
Kutkholh daan
1. A hmaisabik ah kut kha tidai thawn ciarter in satpia tampi’n hnih ding.
2. Kut zaphak pahnih kom in nuai ding.
3. Kut zaphak tlun lam in kutzung karlak pawl nuai ding.
4. kut zaphak a sunglam in kutzung karlak pawl nuai ding.
5. Kut zungcang pawl kuul ter ih kutzung pawl thuah ih nuai ding.
6. Kut zungpi kha kut khatlam in huum ih nuai ding.
7. Kut khatlam ih kutzung pawl kom in khatlam kut zaphak ah nuai ding.
8. Satpia phul pawl tidai thawn faiten tleuhsaal ding.
-Towel/ Tissue thawn ro ko kut hnul ding.
-Kutkholh sung a malbik seconds (20) rei ih kholh ding.
Crd : Chin Telehealth