By, Loyal
Phun li a kai rero lai mi nauhakpa hrangah cun inn ih um cu a nuam a ti bik. Inn ah cun siangpahrang a si ko. A duhtapoh in a ei thei. A bik in arti a duh tuk, arti kio.
Zingkhat cu thawhhlam ah a nu in buhkio a tuah sak. A nu in rawl ei ding in a ko. A buhkio kaankhat tu ah arti kio a ret ih kaankhat sawn ah zianghman a ret lo. A nu in hi ti’n a sut.
‘Khuimi deuh na ei ding?’
‘Arti um tu ka ei ding’ ti’n arti um tu cu a kut in a khih. Cun a nu in
‘arti a hrek in i pe ve awla, thuanthu pakhat ah kum li mi nauhakte in a nu apple a seu si. Tu, nang cu kum hra na ti zo, arti cu i seu ko aw.’
‘Nauhakpa cu nauhakpa kei cu kei, ka lo seu thei lo.’
‘Taktak maw?’
Nauhak pa cun arti cu a cuh lohli ih a ka ah a bar cih. A nu cun
‘na sir aw lo ding ti?’
‘Sir aw lo.’
Arti ei phukpho phah in a ti. A fapa ih arti ei rero lai cu zoh phah in a nu cu a buhkio a ei. A buhkio sungih a thup mi arti pum hnih cu a fapa ih hmuh ding in a lang terhrim. ‘Ka fapa…. duhham tuk tu pawl hi an tuarna thei ti thei ringring aw.’
Arti ei rero tu a fapa cu a mitthli dum deldel in a nu cu a zoh.
Ni dang ah a nu in a sut lala, tuittum ah cun a fapa in arti um lo tu a hril. A nu in
‘na sir aw lo taktak kem?’
‘Kum li pa te hman in a nu apple a seuh si kei cu kum 10’ tiah a ti. A fapa cun buhkio cu a ei hmuthmo. A cem tiang a ei nan arti kio a tong lo. Cu lai ah a nu in a buhkio sungih arti pakhat a thup bet mi hmu ding in a lang ter. ‘Ka fapa…. hlawk nak ngah duh ruangih tlawmngai awkter cu zianghman ngahlonak ah a cang thei.’ tiah a ti lala. A fapa cun mithmai sia riamri te thawn a nu cu a zoh.
A nu cun buhkio kaan hnih a tuah lala.
‘Ka fapa khuimi deuh a ei ding?’
‘Nangmah hril ko aw, nang nu na sisi, na duh lolo ka ei ding’
‘A si le cu ka lo zangfah lo ding maw’ a ti’h arti umtu buhkio cu a la. A fapa cu buhkio a ei rero. A hrek hrawng a ei ttheh in a buhkio sungah arti kio pumkhat a hmu. A nu in
‘Ka fapa…. tlawmngai tak ih thi tuah le mi ttihzah thiam tu cun hlawknak an co ringring’ tiah a ti.
Phun li kai lai nauhakpa cun a nu’i ttong duh san a thei lo men ding nan, ttongkam pa thum thawn buhkio a ei cu a hngilh dah ka zum lo.