Chin National Organization (CNO) cun Falam peng sung ah Siizung (1) le Center (7) ong in natnak tuamhlawm man le sii man zianghman pek tul lo in mipi hrang harhdamnak rian an tuan rero thu CNO ih Harhdamnak Department secretary Salai Lai Lian Hmung hnen ihsin theih a si.
Chin National Organization (CNO) cun 2021 April thla ihsin a tul daan vek in damlo zohnak hi an rak nei thok rero zo ih tufang ah siizung (1) le center (7) felfai ten nei in mipi pawl hnen ah minor le major operation tiang damlo zohnak le tuamhlawmnak an nei thei hlei ah mipi 10,200 luan tuamhlawmnak an nei zo tiah theih a si.
Chin National Organization ih Central Council member le Harhdamnak Department ih hnatuantu nurse a si mi Mai Helen Van Nei Cuai cun’ “2021 November ihsin 2022 September tiang Minor operation hi (pum at ih nausar telin) 106 luan kan tuah zo ih major operation hi 52 luan kan tuah zo. Punghman in naunei theimi pawl nausarnak kan nei sak zo mi hi 9 an si ih operation tuah tullo nan natnak dangdang ruangih Siizung to mi hi 63 an si” tiah The Rihli Voice hnen ah a sim.
Hivek ih damlo tuamhlawmnak hnatuan hi CDM a tuahtu nurse le siibawi hrekkhat in ram le miphun zalennak hrang an hnatuan tan ih CDM an tuah hlei ah thih leh nun karlak ah “mipi hrangah kan thiamnak thawn ral kan do ve” timi thinlung pu in an tuan rero ih tufang ah hnatuantu hi siibawi (5) le Nurse 16 an si tiah theih a si.
Major le minor operation tuahnak cet pawl cu Kalay-PDF pawl thawn hlawm awk in Chin National Organization ih Siizung ah Kalay lam siseh Falam peng sung ta siseh damlo pawl tuamhlawmnak an nei rero mi a si ih minor le major operation tuahnak cet thar khal an tul zet tiah theih a si.
“Mobile clinic khal a cang thei tawk in kan feh ih Mobile Clinic le Center pawl ah a khua zawng in Laitlang Falam peng le Lairawn huap khua 140 luan ih mipi damlo tuamhlawmnak kan nei zo. OPD, Center le mobile clinic ih damlo kan tuamhlawm mi zate kom hi 10,000 luan a si zo. Sii le tuamhlawmnak thilri pawl siseh damlo nat checknak le minor le major operation tuahnak cet pawl tiang siseh kan tul zet. A cang thei tawk in nun thap tiang huam in kan doctor pawl le kan nih nurse pawl in pumpek kan ngam ih kan ram sung ah mipi pawl in sii le thilri um lo ruangih tuamhlawmnak a um lo ruangah mak lo te ih an nun liam lo dingin ramsung, ramleng ih um mi mipi pawl ih bomnak kan tul ngaingai a si” tiah Mai Helen Van Nei Cui cun a sim bet.
Chin National Organization (CNO) hin an ding thok ihsin mah milai pi leinatnak thawn bomnak hnatuan (humanitarian) a tuantu pawl, CCRFC, NUG, Chin Health Organization (CHO) leh ramsung/ramleng um bulpak mipi pawl ih bomnak thawn harhdamnak hnatuan hi a cang thei tawk in an rak tuan rero ih a rei hlan ah center (1) ong bet ding tumtahnak khal an nei tiah Health Department Secretary Salai Lai Lian Hmung hnen in theih a si.