By, Salai C Lian
Myanmar rampi huap ih dothlengnak thazang caknak hmun pawl ahcun doawknak puak awn a thang peh rero lai. Kachin ramkulh, Rakhai ramkulh, Sagaing ramthen, Magway ramthen, Bago Yomah nisuahnak lam siseh, Taningtayee tivek in hmun tampi ah meithal puak awn theih ding a um.
Doawknak cawl tluk asi zo mi Shanram saklam ahcun China ram ih relrem saknak thawn lungkim tlangnak then khat an tuah. Cumi rualrual in March ni 4 ah Arakan Army pawl ih Press Conference kan hmuh ih, leitlun dinhmun in kan thlir a sile March ni 2 le March ni 3 ah Thailand Parliament in Myanmar ramsung thu hla rel khawmnak le March ni 4 le March ni 4 le March ni 5 ah Australia ih an tonawk mi Asian Foreign Affair Minister pawl tonawknak khal ah Myanmar ramsung thu hla an rel tel thotho.
Hmun then khat pawl ahcun raldonak nasa sawn fehpi tum in timlamnak an nei rero ih, hmaisawnnak ding pakhat hnu pakhat a ra ding timi cu a faing zet zo. Mipi then khat pawl ih kan rak khawruah har zet mi cu Shanram saklam dinhmun a si. Ngaingai te ti ahcun Shanram saklam kan zoh asile China thawn ramri a dai aw mi cu Kokant ram pakhat lawng a si. TaAng pawl ih Man Ttung, Namh ram pawl cu a sunglam lawngah a um. Arakan Army (AA) ralkap timi cu a hla tuk lai.
Myanmar rampi ih nitlaknak lam bik ah a um. Ram dinhmun zoh ahcun China pawl ih pumsumnak hrang thupi zetzet a um ko nan, AA ralkap pawl hmaiton si maw, direct ih nor thei dinhmun an si lo. Cumi karlak ah thuneihnak latu ralkap council pawl cun TaAng TNLA rakap pawl ih an lak zo mi khawpi 3 cu ralkap uknak an phuang. A sullam cu TNLA pawl hi Kokant an si lo timi an rel duh mi a si.
AA hruati pakhat asi mi Dr. Ngiu Tun Aung khal in tui China ram thawn thurelkhawmnak kan neih mi cu Shanram saklam hrang lawng asiih, Rakhai ram hrang ahcun zianghman that hnemnak a um lo tiah a sim. Cutik ah tui China le saklam rualvah 3 pawl ih thurel khawmnak an neih mi hi ngaingai te ti ahcun Kokant hrang pakhat lawng ti lo ahcun thu hla fiangfai mi, rah a suak lo timi a lang ter. A ngangai ahcun ram veng hnen pawl ih nornak men lawngin cingfel theih ding khop in Myanmar ramsung buainak hi a ol ai lo ding. Saklam rualvah 3 pawl khal in hrial theih lo mi thil a um ruangah thin sau cuh in, zawn an lung men tla a bang.
Curuangah Myanmar ramsung buainak hi cu ziangtin kan tuah asile cingfel theih a si ding timi cu Myanmar ram, mipi pawl in an thei bik. Ziangtluk in an thei ti asile nauhak pawl ihsin thok in an thei. Hivek ih theihnak dingah ruahnak sang zetzet nei mi ramkelh thu lam ih, Theory pawl theih tul ruangah asi lo. Myanmar rampi kum sawm siar ralbuainak, farahnak le thinlung tek thehnak hor kuam pi sung, tla dingih mi tuah tupawl zo an si timi rak theih cun a ngah zo. Himi pawl khal veng hnen ram pawl zaten an thei cia theh. Ngaingai ahcun ramveng hnen pawl khal in an mai hmaikhua sial ih, pursumnak hrang lawng ruat lo hai sehla cu Myanmar ramsung buainak cu ol ai ten cing fel theih a si ding.
Myanmar ramsung buainak pawl hi a thar a kai tu ding pawl in dung an tolh sal ding maw? Hmailam ah an feh vivo ding timi mitkhar bun ih an thlir sung cu a dik mi an hmu thei lo ding. Hivek thlirnak ruangah a fiangfai mi, nauhak pawl hman ih an hmuh thei mi thu dik rah suak thawn an hlat awknak a si. Myanmar rampi cu tualsung khawtlang nun harsatnak rak thlen tupawl cingfelnak ding lamzin cu tluangtlam te a si. Hmailam can ih Myanmar rampi dinsuahnak dingah ralkap telh lo ding hi a si bik mai. Ralkap timi cu khawsung mipawl ih uknak hnuaih um dingmi a si. Cumi lawngah zapi duh mi Federal Democracy rampi kan din suak thei ding.
Hivek ram kan din suak thei lawngah venghnen ram pawl harsatnak thlen lo mi, tuanvolaknak nei thlapthli mi rampi ah a cang thei ding. India ram tla zianghman phan a um lonak cu cuvek ram a si ruangah a si. Leitlun ram pehtlaihnak lam ah ka tuanvo tumpi a si timi lungput thawn kan tuah ding. Milai covo kan upat ding. Venghnen ram pawl thawn tualsung thansonak lam ah kan tuan khawm ding. Leitlu pumpu luk ih ram pawl thawn ramsung thansonak kan tuah ding. Ralhrang pawl an sual a tawrh mawh tuk tivek men ih dung let hoi kir sal tivek san a cem zo.
Myanmar rampi buainak cu khat lam in nehnak an co raungih cem mai ding phun a si lo. Mipi pawl ih nehnak co dingmi ramkhel thu buai a si. Myanmar ramsung buainak kan cingfel ding asile tluangtlam te’n felfai ten kan ruah a tul. Mipi hi a thupi bik tin kan rel zo. Myanmar ram timi cu leitlun buainak pawl thawn hla aw zet ih um mi a si. Leitlun rampi pawl in thu hla thei fiang hnai lo ih an ruah dan le ngai dan tampi ruangah buainak hi a ngerh aw hawk sinsin thei.
America President tuan hlun Trump san lai, White House ah Myanmar ramsung thlei danawknak, tluktlang awknak a um lo thu pawl an rel cu, President ih rak tong dah zo mi kan mang lai ko ding. Tell me Where is the place exactly tiin Myanmar rampi khuiah a um timi hman America President in a thei lo. Curuangah venghnen ram pawl khal in Myanmar ramsung buainak cingfel tik ah Myanmar mipi pawl vek in tluangtlam te’n ruat ih an cingfel a tul.