By, Salai C Lian
China ram, Huhan khawpi ihsin a rakthok mi leitlun pulhnat, nathrik hi zohman in kan theihhngil hrih lo ding a zum um. Leilung pumpi buainak pe tu nathrik cu nathrik zohnakhmun (Laboratory) sungihduur bun (Lens) thawn zoh lawng ah hmuh theih a si. Tui Myanmar ramsung buainak pawl khal thiamnaksang duurbun thawn kan zohhman ah hmuh harzet mi nathrik phunkhat thawn kan rak buai rero zo tla a sithei.
Himi cu ralhrang pawl in thuneihnak an lak mi Myanmar ramsung ah tlawmngai pumpe aw in le thuneihnak la tu pawl do rerotu mi then khat pawl in ralhrang pawl do phah rero cing in thuneihnak la tu pawlih nathrik kai tu pawl an si. Himi zawn ah raldonak thawn pehpar in ralrel thiamzettu Song Zhong in “ral pawl neh dingih do rero phah in ralpawl ih ziaza kan kai ve lo lawngah upat le zah um mi raldonak ih hlawhtlinnak kan hmu ding” tiah a sim.
Myanmar rampi ah thuenihnak latu ralhrang pawl cimit dingah ralthuam kaiih zalennak sual rerotu pawl dinhmun in thuneihnak la tu pawlih lamzin hlun, an tuahdanvek pawl hrial in, zah um mi dothlengnak sualtu si in, san thuanthu sung ih kan hmin a tan ding khal a poi mawh bik caan a si.
Tui kan dinhmunvek a sile Myanmar ramsung hmun tinkim ah ralthuam kai pawlkom tampi a suakih, cuang pawl cu uknak pakhat hnuaiihsin kilkhawi a harbik caan a si. Kum 70 rei ramsung ralbuainak ihsin Thalpau dothlengnak thawn a hrinsuah mi ralthuamkai pawl khal siarcawk lo ding tiang in a phung ciamco. Tlangpar hriamkai pawl thawn rualpitha kaiawtu pawl siseh, NUG kuthnuaiih mipi humhimtu ralkap pawl, Local PDF pawl, ziang pawlkom hnuaihmanih um lo mi ralthuamkai pawl tiin hmunkhat ih kilkhawi theih lo (control) theih lo dinhmun thawn Myanmar san thuanthu cu kan pal rerolai cu a si!
Tui kandinhmun ah cun ralhrang pawl in ukawknak lam an fehpi thei lo vek in, NUG khal in ukawknak lam ah ziangkim in an tuahthei lo. Cumilai ah ralthuamkai mah le mah karlak siseh, ralthuamkai pawl in mipi pawl cu ralhrang pawl ih dalan natuan tiin an puh in, thuhla fumfekhal um lo, daan lenglam ih cangvaihnak pawl khal an tam vivo. Mipi pawl cu thuhla felfai puhmawh ding um lo ih an hrem, an thianfai mi thahthim ding naibik mi cu kan dung thal, February thlasungah, Sagaing ramthen, Walet peng, mipi ralkap, battalion 2 ih Section commander tiaw pa cun fala pakhat in a rak duh ve lo ruangah tiin meithal thawn a kah that mi a si. Ngaingaite tiah cun hivek ih cangvaihnak hi cu ralthuam kan neih a sile kan duhduh in mipi pawl par ah kan tuahthei timi then khat mipi ralkap pawl ih lungput lang tertu a si.
A dang thahthim ding mi pakhat cu khawsung kilhimtu (PKP) hotu sang timi pa in a dang ralthuamkai pawlkom pawl in thuhla fumfe nei lo in, a fate pahnih hmaiih an rak kahthah mi a si. Ralhrang pawl kan tih rero lai ah cuvek thilcangmi pawl hrang diknak hawl dingin NUG tivek pawl tiang a sangsang ten thuhla an thlen nan, hmualneizet in hremnak an rak pethei lo.
Cuitlunah a rung tangtu inn sang pawl cun ralhrang pawl ih mi tibuai ding an tihvek in, Khawsung PKP pawl ihsual an hawlnak khal an tuarih, an mahtiang hmunhimnak hawl in an tlan. Tahthim ding dang pakhat um lai mi cu Magway ramthen, Myiang peng ih sin nitin khawpi sungih bazar vakaitu nunau pakhat cu a kut dunglam ih an khihhnu ah a hmai tuam sak in, ralhrang pawl thuhla petu an tiih an taksapum durhthehko an rakvuak mi a si. Thu hla puhmawh ding (whiteness) felfai nei lo in khawsung PLP pawl in duhduh ih kutthlak tuar mi a si. Hivek pawl hi ground ah thuhla felfai, fumfe um lo in, mipi pawl par, duhduh ih cangvaihnak a si. Tuikan do rero mi ralhrang pawl ih cangvaih daan thawn danglamnak zianghman a um lo. Thil bangawtluk a si. A dang pakhat um hrih mi cu Nikum 2023 ah mipi pawl a bur ih tualthahnak a si.
Himi cu Taningtayee ramthen, လောင်းလုံး pengkulh sung ah Phungki, nunau pawl le kum upa pawl tel in khawsung mi minung 20 lenglo cu ralhrang pawl ih thuhla petu (dalan) nan si tiah an puhih, thuhla felfai um lo in mipi ralkap pawl in an thianfaitheh mi a si. Atlun ih thil thlengmi pawl thawn pehpar in NUG ih thuthennak zunglam pawl in ziangvek in an cingfel ih, ziangtin hremnak an pe timi pawl khal a hnuthlurh ih mipi pawl an theihter mi zianghman a um hrih lo.
Asinan khatlam ah cun sual mawhneilo khawsung mi pawl cu ralhrang pawl ih kutsungah thi lo in mipi ralkap pawl, fimkhur lo zetih cangvainak pawl ruangah an nun a liam. Hivek pawl cu khawsung mipi pawl cu ralhrang pawl in zianghman puhmawh nei lo ih an thahmi pawl thawn danglamnak a nei lo. Ralhrang pawl ih ziavek cekci a si. Dothlengnak sual rerotu mipi ralkap khat le khat karlak khal hmun ram cuhawknak, thuneihnak cuhawknak pawl ihsin, ralkap bu pheldarh si maw, kaphnih karlak thuhla hmuhawk thiam lo ruangih kahawknak tiang a thleng. Cuang pawl cu kanmah sung rori, Chin ramkulh sungah a thleng. Rel tam le simfiang tul lo in kan theithiam ko ding. Thenkhat cun buainak meisa mit tum lo in, lam tang hawl ah caan tha hawl in an rak cangvaiih, buainak dam lam pan lon a alhhlio sinsin lam.
Chin ramkulh rori cun a silonan Taningtayee ramthen sung, National Unity Government (NUG) a cozah, MoD kuthnuai ralkap pawl in mi an kaih ruangah buainak a rak suakzo. Kaphnih thu relrem dingih an tuah rero lai ah thuhla an hmuhawk thiamlonak ihsin kaphnih minung kaih khihawknak tiang a thlengih buainak cu a hnok sinsin. Neitabik ahcun NUG kuhnuai ihsin battalion pakhat tluk zikte an suakih an mah ten an ding.
Myanmar rampi hmunlainak hrawngih PDF pawl thazang caknak hmun pawl khal ah tlunlamih thuhlavek thotho in an rak buaizo. 2023 kum, July thla zarh neitabik le August thlathok lam ah buainak then khat a rak um. NUG kuthnuai a silo mi mipi ralkap pawl cu an ramsungah hmunkhuar lo ding in thu an suah. NUG ih theihpi mi PDF mah le mah karlak tiang kahawknak a raksuak.
Hivek thuhla thawn pehpar in, ahleice in National Unity Government (NUG), MoD ih mi ciahtheinak pawl hi khawsungmi pawl in thusuhnak an tuahthlang. A dang langsarzet mi doawknak pakhat um mi cu NUG kuthnuai a si mi Minchian PDF le Yesagyo PKP pawl cu Yelecuun ah doawknak a suakih, kaphnih ihsin thuneih sawn si duh ih buainak a suak mi a si tiah khawsung mi pawl tiang in an rak soisel.
Himi hmuahhmuah pawl cu dothlengnak sual rero laiih thilthlengmi pawl a siih mipi pawl ih an raktheih lo mi, Media cahmai pawl ihthleng lo mi, mipi ralkap pawl karlakbuainak, riahsiatzia dinhmun tampi khal a um theilai thotho. Mipi ralkap pawl kutsungih um mi ralthuam pawl hi ngaingaite tiah cun mipi pawl ih tawhkhawm mi thawn, an bawmnak pawl thawn lei kawm mi a si ruangah mipi pawl hmuhsuam le va nekrawknak ah hmang lo dingin le khat le khat karlak, lungrualnak um sinsin ih, kan hmuitinmi thunehnak latu ralhrang pawl kan cimit dingih thil poi mawhbik le thupibik mi a si.
Curaungah dothlengnak a tawptiang kan fehnak ding zalam tluan ah a tlunih tarlang mi pawl vekih buainak a suahlonak dingah mipi ralkap pawl fimkhur le ralringzetih kan cangvaih a tulthlang timi hi mi cahram te thawn kan sawmaw duh.