Salai Loyal
Ka pai’ hnen in cakuat ka ngah. Ka pa in a hnen ah ra in ramnuam le rammawizet a si mi a umnak ramah ra um ve dingin i ko. Phurzet le thathozet in ka pok suak.
Thlen ka hngakhlap zet ih a tlan in ka tlan ciamco. Cutiih ka tlan rero laiah lungte ka sit ngah. A va naa ve…. Ka kezungpi tin a pawk hliaihliai. Ka kezungpi hma cu miih an hmuh ka duh lo. Ka ning a zat. Curuangah thate’n ka tuam hlenhli. Cun lungte sit ngah nawn lo dingin ralring zet phah in nuam tete’n ka feh.
Ka fehnak lamzin tluan ah pitar, putar, fala, tlangval, upa, nauhak, midum, miring, miphunkip ka tong phah vivo. Cui pawl cu ka tumtahnak ram ka thlen theinak ding ih ka lam i daltu, ka lam i hnaihnoktu an si ka duh lo. Curuangah zohman zoh leh hmuh ka duh lo. Um thei lo ih an harnak ka bawm ngah ding ka phang. An nuamnak va hmanpi ding ka duh lo. Curuangah mitsing in ka feh. Ka mit ka sing nan an aw ka thei thotho. Ka feh cak deuhdeuh. Ka mit ka sin ruangah thil pakhat ka sit ngah lala. A va poi ve aw …… Hma ka nei lala. Midang ih ka hma an hmuh ka duh lo ruangah ka thup aw rero nak lai ah, hma dang ka nei lala. Ka khuk in thi tampi a suak. Ka khuk cu sii ka hnih ih ka tuam tha. Miin hma ka nei ti an theih lo nak dingah bawngbi sau ka hruh. Cun ka tumtahnak ram lam pan cun ka feh sal.
Ka feh cak ngam nawn lo. Ka mit ka sing ngam nawn lo. Ralring phah zet in ka feh hmuthmo. Tlangval ka si bangin fala mawi te ka hmuh tikah ka um thei nawn lo. A mawi nasa. A mawi nasa ti men in a daih lo. Vancungfala thawn zo mawi deuh ti theih a si ding. Zilthli lak ah a sam cu an zam pherpho rero. Dunglam ih a sam an zam zawngah a hngawng varte cu a lang. Kalkhat hnu kalkhat ke a kal dan cu zoh a nuam in a nonal tha nasa. A tai diitte le a mawi tawk ciah. A mit minte cu a no in a mawi. Zukneung mitmen bang a mitmen mawite cu ka zohkhop theilo. Zaan khuathim lak ih mawizet ih a tleu mi Thlapa le Siar pawl cu an mawi in zoh an nuam ka rak ti dah. Tuah cun cu pawl ih mawinak cun hi fala nuih mawinak ah a hloral theh. Cutlukih fala mawi cu ka mipa sinakin zohlo in ka um thei lo. Cu tiih ka zoh rero ruangah ka hmailam cu ka zoh thiam nawn lo. Aih…… huiha… motor pakhat thawn kan pahaw ngah lala. Ka kuk a kiak. Buaithlak thei ve, ziangtin ka thupaw thei nawn ding. Pakhat cu ka ruat suak ngah. Ka kutkiak cu ka tuamaw tha ih cun angki tumpi bansau ka hruh ih ka kut cu ka thup.
Khua tampi ka lan hnu ahcun ka bang zetve thlang ih cawlh ka duh. Tiva kiangih um thingkung hnuai ah cun ka zau. Hmakhat te ah ka it that. Ka manglam vek in ciik celcel ka thei. Ka ngaitha ih vate pahnih thu an rak elaw rero a rak si. An thu elawk mi cu upat an cuhaw hi a rak si. Vate unau hnih. A upa sawn tu cun “kei cu uapa sawn ka si ruangah ka pai hmin aiah ka hmin hi hman a si ding. Kan sungkua hmin in suh a si le ka pai hmin sal nawnlo in ka hmin na salve ding. Na nufa pawl khal rak sim theh aw.” tiah a ti. Cun a nautasawn khalcun a duh vece lo. A el ve. “Nauta sawn ka sinan ka nu le pai ro cotu ka si. Curuangah ka pai hmin umnak ahcun ka hmin a um a tul. A hlan ah kan inn sangkaa hmaiah ka pai hmin kan tar. A sinan tu ahcun ka hmin sawn kan tar zo. Nang tla na hmu in na thei ve ko kha. Cucun ka pai hmin hlon in ka hmin hman a si ding ti a lang ter.” tiah a ti ve . An el aw ciamco ih a netabik ahcun an sual aw ciamco.
Reinawn an sualawk hnu ahcun an bang nasa veve thang. An sualawk cu an cawl duh hrih cuanglo. An sualawk rero phah cun thingkung par in tiva kapte ah an tla. A tawk deuh lai. Tiva kap ah an tla ih, tiva sungah tla sehla cu an thi veve ding nan. An sualawk cu an cawl duh hrih cuanglo. Tidai puante lak ah cun thih hlan lo an sualaw ding hi a si bik ko. Cutiih an sualawk zohphah cun tiva khatlam ralah tong rero awn ka thei. Ka hei zoh. Rul pahnih. An tong mi ka ngai tha. Rul unau an rak si. “Naupa thinsau te’n kan rak hngak rero ih tucun kan suncaw ah an cang thlang ding. Mah unau rori sualaw rero. An aa em mai an sa kan ei lawlaw ding.” Tiin a upa sawntu cun a ti. A nauta sawn cun “ A si lo ah. Buai tullonak ah an buai rero ih an cim ko lo maw. Kan mah unau vek in an pai hmih kha kan sungkua hmin tiin tivehai sehla an sualaw lo dingih kan nih khalin an sa kan ei ngahlo ding nan. Kan mah unau kan hlawk si ko. Haha”. Cun upa sawntu cu ti sungah lut in vate unau umnak lam ah a ra feh zurzo. Vate unau cu vik tiin a kaih fukfi. Cun a nau cu a hei ko ih an unau in vate unau cu pakhat veve an suncawah an hmang. Lungawi le mithmai pan tein an hnihsan aw ih tiva ralah an va tlangsal. Keikhal ka hmai ka phiah ih ka poksuak sal.
Ka tumtahmi ram lam pan in tupirul ka pah. A suk ah ka tum. A so ah ka kai. Lam kel, lam ding, lam tluang, lam kawi a phunkim ka pah tlang. Ka bang zet in a har ka ti zet. Cawlh ka duh. Thawzetih it hlenhli ka duh. A si nan ka tumtahmi ramnuam le rammawi thlen ka hngakhlap. Ka ril a rawngtuk thlang, cawlh ka duh. Curangah thingkung tumpi hnuaiah ka to ih ka rawl fun mi ka ei. Rawl ka ei theh in hmakhatte ka zau. Ka mit ka sing nan ka itthat lo. Cutiin ka zau laiah ka thlanglam in thilawn celcel ka thei. Ka mitsing phah cun ka ngaitha ih thu an rak sutaw a rak si. “Na hmin? Ziangmi phunhnam? Khui in na ra?” tipawl an rak sutaw ciamco. Pakhat hnu pakhat an su aw ciamco. Tui tum ih a suh mi cu a va danglamve tiih ka hei zoh. Sihte pakhat a rak si. Cun a suttu ka zoh ih Laiking a rak si.
L – Na hmin??????
S – Keu Bol
L – Khui in na ra???
S – Thlanglam ram in.
L – Na miphun? Na phunhnam?
S – Sihte.
L – Sihte ti lawng maw??? Sihte ah ziangmi hnam na si????
S – Pu Laiking kan za te’n Sihte kan si theh. Asen kan si khalah adum kan si khalah Sihte kan si theh. Sihte ti hnuhnu cun Sihte dum ka si, Sihte sen ka si, Sihte thlanei ka si kan tiawk a tul lai maw si?
L – !!!!!!!!!!!!!!!!!!!! ( Ziang hman tong ngaihnak a thei nawn lo.)
Culaifangah a dunglam ih ding hliarhliarmi Sihte dang pawlin “ Pu Laiking kan nih Sihte cu kan hnamhmin ah kan baui velo. Kan zaten sihte ah pumkhat kan si. Sihte sen ih harsatnak cu Sihte zatei’ harsatnak a si. Sihte dum ih nuamnak le lungawinak cu Sihte zatei’ ih nuamnak le lungawinak a si. We are one in Sihte” tiin rual te’n an au. Laiking cun lungawi le mithmaipan te’n a sawn sal.
“Tuvekin nan lungrual zetih ka lo lungawi pi nasa. Kan unau Ar pawl talcu an lungrual lo tukih cazin lak a buaithlak tuk. Pakhat in kei cu Laiar ka si a ti. A dang in kei Kawlar, Kei CP tivek in a thekaw hniaihniai. Cazin ka tuah le a hnoktheh ringring. Curangah kan pu Kiosa in lungrualbik mi phunhnam hmuh kaduh, lawksawngpek ka duh in tiih, tuhi lungrual bikmi phunhnam kan hawl rero a si. Tuah cun nanmah Sihte pawlin nan ngah thlang ding. Nan lungrualnak ih a rahsuak mi a sihi. Mah ten’ ukawk theinak nan ngah ding” tiah a ti. Cun Sihte pawl cun “ Taktak maw? Ngaingai maw???” an ti celcel. Culaiah Kiosa a ra ih “nan umdan leh nan tong ka rak theitheh. Laiking ih thu alosim mi kha adik theh. Tui ni ihsin nan siangpahrang ding nan duhduh nan hril thei.” Tiah a ti. Sihte pawl cu lungawi in an hni an kheek. An khir an lam. Kiosa cu a tlan hlo. Keikhal ka hni hruthri. Ziang ruangah ka hni ti ka theiawlo. Laiking maw ka hnihsan, a silole Ar pawl ih thu an relmi maw? A si lo. A si le cu Kiosa maw? A si cuanglo. Sihte….. Aw ee Sihte pawl ih lungrual danzia ka hmuhin ka thinlungah lungawinak thawn a khatih ka hnih mi a si.
Ka dingih ka pok suaksal. Tlang pakhat ka thlengih khua ka cuan. Ka dinnak tlang cu ka tumtahmi ram ih hnarpawn tlang a si. Tlanghnuai ah cun an khua a um cih. An khua cu a kau in a mawi, a thianghlim. Khawsung luh ka hngakhlapzet. Hnarpawn ka thlengzo ti a si nan, tlangpar in tlanghnuai thlen ding cun nazi pathum sunglai feh a tul lai. Curuangah ka feh paih thei nawn lo. Ka baang in ka cau tukzo fawn. Thlen ol thei dan ka ngaihtuah. Ka thei suak. Thingtum tuumtuk lemlo ka hawl. Ka hmuh in thingtum cu ka hril ih a parah ka to. A nuam in a sawt zet. Ka ke a zawng nawnlo ih ka bang tla a dem nasa. Cutiih nuam tizetih ka suk zurzo rero laiah rinlomi thil ka tong. Auuuu!!!!!!!!!!!!!! Ka thingtum cun thil a pahngahih ka pet vurvo. Cun zo a hnuai thleng hmaihmai tiin tlan zuamaw cu kan si lo nan, cakzet in thingtum thawncun kan ril tlang veve.
Ahnuai karak thlengzo a si hi. Ka mit ka mingzik. Asinan ka lu a zingih ka mit a rau. Ka mit rau pi’n cun ka meng tento. Ka kiangkap ah mipawl an hnok celcel. Ka lu a zing ciamco ih ka mit ka singsal. Ka mit ka mensal cun pindan pakhat sungah ka rakum. Tho ka tum nan ka tho theilo. Cutiin tho ka tum rero laiah mi pakhatin sangkaa a run ong. Ka hei zoh. Aw…. nurse sayamah. Sayamah cun ka hrangih a tulmi thil tete pawl i tuah sak. Sii ei tulmi i ei ter, a dawt tulmi i dawt. A theh in suaksal dingin sangkaa lam a pan. “ Sayamah ” Ka aw a theih in sayamah cun i ra pan. Cun ka theih duh mi tete pawl ka sut ih i sim fiang. Ka pai umnak khua a si thu, hnarpawn tlanghnuaiah mithi sar ih sar ka siih ka pa in siizung ah i rak hruai thu. Cun ka mit a pahnih in ka sawhsiat ih ka pa in a mit i pe ti thu. Ka thi a suak tamtuk ruangah ka pa in a tulzatin a thi in pek thu. Cun ka ke a pahnih in a kiat ti thu le ka pa cu kei mah ruangah a thi ti thu pawl thinsauzet in i sim fiang. Cuthehin a suak. Lungzur le poi titak in ka tap. Sii ih in nehtuk ruangah ka itthat sal lala.
Ka mang ah cun ka pa a ra. Ka pa cun “ Ka fapa ziang na cang saw ii??? Na rat thok ah thlen na hngakhlaptuk ih zianghman ruatlo le lamzin zohlo ih na tlan ruangah na kezungpi na siatsuah. A sinan na sualnak na thupaw thei. Cun nangmaihrang lawnglawng zohih midanghrang zianghman na ruatlo ruangah na khuk a thi lala. Cu khal cu mi theihlo dingin na thupaw theilai. Cun na thinlung duhnak lawnglawng na thlun ruangah na kut a kiak. Na hliamhma ngah a tamtuk zo. Na hma cu na thupawk a hardeuh thlang. Asinan na thupaw tento thei lai. Asinan na tumtah mi ram na thlenzik hnuah harsatnak na tuarzo le na pahtlang theizo mi pawl hman hmaisong loin a ol zawngih thlen na tum. Na ke thawn bangzetin nazi pathum sung ra fehbet awla kan pafa in nuamzetin caan kan hmang tlang thei dingnan. A olzawngih thil na ngah a si le a harzawngin na caan na hmang ding ti a si ko……” Ka kut a hen zukziih ka thang dukdi. Awww… mituih sayamah in sii i ra dawt lala. Sayamah cu a theh in suah a tum sal lala. “Sayamah to ka duh” ka ti ih in to ter. Cun a suak sal.
Ka mang ih ka pai thu i sim mi pawl pakhat hnu pakhat ka ruat sal. Ka lamtluan ih ka hmuh ka ton mi pawl ka ruat. Ka pai thu i sim mi a va dik ve …… Cutiih ka ruat rero lai ah vate unau hnih ka mang suak. Unau karlak ah buai lo in rul unau vekin lungrual hai sehla an thilo ding nan. Mai hmin langter tumlo in an pa ih hmin kha cawisang sawnhai sehla…… Cun Sihte pawl ka mangsuak sal lala. An lungrual nakhi uar a va um em. Ziangvek phunhnam ka si khal ah “ We are one in Sihte” an ti. Ka uar ngaingai. Kei teh Sihte ka si sehla Sihte dum Sihte sen tiah ka buai rero pei maw? Tucu ka dumnak le ka sennak ah ka buai rero si khawh. “ We are one in ….. ” tiin kan au rero men lawng si loin kan nun cih ding can a thlen thei ka va duh em. Cun kei mah le kei mah ka ruat suakaw ngah. Hma fate ka neih hman ah ka thupaw rero. Tucu ka ke a kiat, ka hmai a thi, ka taksa dangkhalah hliamhma tampi ka ngah. Ka hma cu a mal laiah ka thupaw thei nan a tam vivo cun ka thupaw thei nawnlo. Cun thilolsam zawngih ka tuah ka tuan ruangah ka thlencak zetnak ka tumtahmi ram cu ka thleng thei ko nan a nuamnak le a mawinak zianghman ka hmang thei nawnlo. Kalkhat hnu kalkhat in rak feh sehla nuamzet le thin hnangamzet in ka um thei ding nan… A va poive tilo cu a dang rel ding ka nei nawn lo………
““` Ka tumtahmi ram cu ka thlendan a diklo ruangah ka hrangah helram fate ah a cang““`