Salai Loyal
Kei cu tlangkai pawl khi ka uar. Tlang an kai ih kai menmen a theih lo. Tlang an kai ih tlangzim thlentiangin kaithei an zuam. Tlangkai phah in an thinlung hmundang ih a um tikah “Ka ke ka palsual pang ke” tiin an ruahnak cu an tuahmi parah an pesal lohli a ttul. A silo cun an tla lanta si ko. Pakhat ih harsatnak pakhat in a bawmlo in an um thei lo.Veikhat-hnih ah cun bawmduhtuk zetna’n bawmthei lo mi dinhmun ah tla na thleng ttheu. Asinan an titheitawk cun an bawm aw. Duhhamnak an nei nawn lo. An tumtahmi hlawhtlinter lawng khi an thinlungah a um. Minung pawl in an kaidingmi tlang an hriltla a si men thei. Tlang cun mi a hril ve lo. Milian a theilo. Mifarah a theilo. Zozo an sikhalah a ra kaitu hmuahhmuah cu a hrangah tlangkai pawl tiih ko an si cih.
Tlangkai pawl khi “Ziangruangah tlang nan kai” ka titikah “Tlang a um ruang ah kan kai.” an ti. Tlangkai pawl in tlang a um ruangah tlang an kai. A zim thlenthei an tum. An thleng. An ra ttumsal. A tthen cu a zimtiang an thlengih himdante’n an thlengsal. Atthen cu a zim an thleng manlo.
A tthen cu an thleng kona’n hmunrawn ah an ra kirsal theinawn lo. Tlangparih a ummi tikhal pawl, Vurpawl, Ramsa pawl, Thlipi, Ruahpi, Ziang a rathleng ding ti zohman in an rel theilo. Ziangmi kan tongding an theilo. Ziang a ra thlengding ti an theilo. Pakhat ih nunnak cu pakhat ih kutsung ah a um. Paisa in zianghman san a neilo. Paisa hnakin zumawknak le pakhat le pakhat zangfahnak, lungrualnak a thupi sawn.
Hruaitu ih dung an thlun a ttul. Hruaitu ih dung an thlunlo cun an duhnak hmun tlangzim thlen cu a cangtheilo tluk ih ruat a si. Ttongtamnak can khal an nei lo. An hmalam pan in an feh. An tumtahnak an thlentikah an lung a awi. Anhlim. Nuam an ti. Harsatnak an tuartlang. Lungawinak an tuartlang. An thin a nuamtlang. Anthla a ttemtlang.
Aw…..Tlangkai pawl ih thinlung.