Matupi mi 2 cun Aizawl ah an riaknak lam pan ih an fehnak taxi par ah bag pakhat, a sung ih India rupee 200,000/- luan an retnak cu taxi ihsin an tum zawng ah mang nawn lo in an tan ngah pang ih, taxi khaltu (driver) in a hmuh tik ah a va pek sal tiah Bawngkawn veng, Police Station ihsin theih a si.
Taxi khaltu Pu Lalhuzama, Falkland veng mi cun September 27 ni zanlam 4:00 – 4:30 hrawng ah Matupi mi 2 te hi Millennium Center hmai ihsin a phur ih Zotlang Taxi stand ah a rak thum. A passenger 2 an feh hnu, a taxi tawkfang a khal hnu ah Pu Lalhuzama cun a passenger Matupi te 2 ih tanmi bag cu a hmu ih a sung a zoh tik ah India rupee 200,000/- a rak um. Cu ve ten’ Pu Lalhuzama cun Bawngkawn veng ih palik zung (Police Station) ah feh in thuhla um daan a va sim ih bag sung ah a rak um mi vanzam ticket par ih phone number thawn Matupi mi 2 te hi an pehtlaih theisal ih an bag le paisa hi an pekawk sal a si.
Matupi mi 2 hi September 27 ni ah Delhi ihsin Aizawl lam ah ra kirsal mi an si ih an riaknak ding Hotel pan dingin Pu Lalhuzama ih taxi hi an to mi a si. Taxi ihsin an tum zawng ah an bag cu an mang hngilh ih an tan ti an theiawk tik ah taxi cu a rak fehzo ruangah mangbang an hai zet in an um ih culai ah Pu Lalhuzama hin an bag cu rak hmu lohli in tu vek in an pekawk sal thei mi a si thu Matupi 2 cun an sim.
