Committee Representing Pyidaungsu Hluttaw ih Public Affairs Committee cun CDM a tuahtu mi raltha pawl hrang a cang theitawk in tanpinak hna an tuan ih harhdamnak le nuntu khawsaknak lam ih harsatnak a tongtu CDM tuahmi 2400 luan hnen ah tanpinak an nei zo thu an tarlang.
Public Affairs Committee cun ramdang ihsin hl utu pawl ih an hlumi sumpai le Ahlu Shin Application le Spring Legends You Tube Channel ih Kyawn-Ngia ihsin an ngah mi sumpai pawl thawn emergency in bawm a tul ngaingai mi CDM tuahtu miraltha pawl hnen ah tanpinak an pek rero ih Kum 2022 January ihsin September tiang CDM a tuahmi mi raltha 2400 leng hrang ah tanpinak sumpai ting 1500 luan an pek zo thu CRPH ih official cahmai ah an tarlang.
Public Affairs Committee in tanpinak an pek daan cu harhdamnak lam le naunei hrangah ting 1, nuntu khawsak harsa tanpinak hrangah thawng 50 tin thulu 3 in tanpinak an pek ih mual liamtu pawl, kaih a tuar pawl le inn thawn awk pawl khal a remcang daan ih zir in tanpinak an pek tiah an sim.
Public Affairs Committee hin ramkulh le ramthen hluttaw palai pawl ih lungkimnak le theihpinak thawn an hnen ih cazin pek mi siseh mah le ramkulh le ramthen hluttaw palai pawl leh focal person pawl in Ahlu Shin Facebook Page ihsin an hnen ih pehtlaihtu pawl an zingzoi hnu ih cazin an pek mi siseh, Public Affairs Committee hnen ih cazin thlengmi pawl hmuahhmuah cu tha te ih zingzoinak le nehnget nak an neih hnu ah tanpinak hi an pek thu khal an tarlang.