Chin National Organization (CNO) ih Fimthiamnak Department cun Chin National Organization/ Chin National Defence Force (CNO/CNDF) ih thuneihnak le kilkhawinak ram sung ih um mi Falam pengsung ih khua 153 ah tlawng an ong ih tlawngta 11,059 luan cazirhnak an nei thei a si.
Chin National Organization (CNO) cun 2021 kum cemlam ihsin nuam teten’ lai khua lam ih tlawngta nauhak pawl hrang fimzirnak an tawlrel rero ih tu fang ah Fimthiamnak Department hmalaknak thawn Falam pengsung lai khua lam ah nauhak tlawngta pawl hrang tlawnginn 153 tiang ong thei in tlawngta 11,059 hnen ah zirhtu Saya/ma 691 thawn cazirhnak an nei thei zo a si.
“September 17 tiang cazin kan khum mi ah tlawnginn hi Hramthok tlawng 55, Lailak tlawng 58, Suakthuan tlawng 13 tin’ a zate kom 153 kan ong thei ih tlawngta hi Hramthok tlawngta 6124, Lailak tlawngta 2157, Suakthuan tlawngta 2121 tin’ tlawngta zate kom 11,059 kan nei thei” tiah Fimthiamnak Department secretary Mai Merry Kip Men cun The Rihli Voice hnen ah a sim.
Chin National Organization (CNO) cun April thla, 2022 kum ah tlawng cazirhnak thawn pehpar in TOT training ni 5 sung an rak tuah ih cumi training ih kaitu saya/ma pawl thawn Fimthiamnak Department cun khua 92 ihsin mipum 258 hnen ah ni 10 sung pek awk mi Tlawng Saya/ma Training cu hmun 4 ah training peknak an rak nei zo.
Cui hlei ah Tualleng tlawng hrang ih hmuitin deuh a si mi tualleng tlawngta nauhak kilkhawi daan le fimthiamnak zirh daan (Early Childhood Care and Development- ECCD) training khal September thla ah mipum 20 hnen ah zarhthum sung (nazi 120 sung) training peknak khal an nei zo a si.
A tu fang ah pumpek ih ca a zirh rero tu tlawng Saya/ma hi 691 an si ih tlawng saya/ma lakawknak ah siseh tlawnginn onnak le tawlrelnak ah khua tin in Tlawng Committee an nei ih Chin National Organization (CNO) ih Fimthiamnak Department thawn pehtlaih awk in hna an tuan rero tiah theih a si.
“Tlawng Saya/ma hi Hramthok tlawng saya/ma 281, Lailak tlawng saya/ma 294, Suakthuan tlawng saya/ma 49 le a dang zirhtu saya/ma 67 tin’ tlawng saya/ma zate kom 691 kan nei. Khua tin ih Tlawng Committee thawn Fimzirnak fumfe zet ih kan fehpi theinak hrang ah Falam peng hi area 7 kan then ih area tin ih tulsammi le harsatnak pawl tawlrelsak le relfelsak tu ding ah supervisor pawl khal kan ret” tiah Fimthiamnak Department Secretary cun a sim bet.
Chin National Organization cun Tlawng ca zirh dingmi textbook khal tawlrel in printoutnak cet thawn mah te in an rial phah rero nan tlawng 150 kiangkap hrang textbook kim ten an daihawk lo ih tlawng saya/ma khal hi duh vek in an daihawk hrih lo tiah theih a si.
Cui’ hlei ah khua hrekkhat ah cun pumpe ih zirhtu saya/ma pawl hi laksawng zianghman pek an si lo ruangah caan rei remcang thiam lo in tlawng phit sal mi khua khal an um.
Hi thu thawn pehpar in Fimthiamnak Department Secretary cun “Textbook hi a cangthei tawk in mah te khal in kan rial ih kan tawlrel rero phah nan sumpai lam in ramsung ramleng mipi ih bomnak tampi kan tul lai. Tlawng saya/ma pawl khal hi training kan rak pek mi Saya/ma si cia CDM tuahmi lak in siseh, volunteer ih tuanduh mi lak in siseh pumpek in hnatuan an si ih ei le in ding zianghman laksawng kan pek thei hrihlo thawn tlawng hrekkhat cu remcanglonak ruangah phit sal mi a um phahphah sal tik ah ramsung ramleng ih um mipi pawl le khua mipi pawl in mah le khua ah pumpek ih hna a rak tuantu tlawng saya/ma pawl hi a cangthei tawk in in rak tuamhlawm sak ve hram uh! Nan tanpinak kan tul ngaingai a si. Tlawng phitsal mi tete a um tik ah tufang ah tlawng kan ongmi cazin hi 150 fangfang hrawng a si thlang nan’ tlawng saya/ma pumpe ih hnatuan tu ding khal kan tul tuk lai thotho ih pumpek ih khua le ram hrang hna a tuan duh kan um a si le +918798409943 ah “Signal” in in rak pehtlaih hram uh tin’ mipi pawl ka sawm duh” tiah The Rihli Voice hnen ah a sim.
Tlawng ca zirh dingmi textbook thawn pehpar in Chin National Organization hin ralkap thuneihnak lak hlan ih system thar zirnak textbook an hmang hrih ih pengsung thawn a milawk lo mi pawl cu lairelnak felfai thawn hlon in an zirhmi sungah an telh lo tiah theih a si.