Falam peng Fimzirnak Department cun October 5, 2022 ni ah Falam pengsung ih area (7) ah Ngan Ca Mawi zuamawknak thawn Leitlun huap Zirhtu Ni (World Teacher’s Day) an hmang thu theih a si.
Fimzirnak Department in Falam peng sung ih mipi ong mi tlawng pawl ah a hmang theithei in Leitlun huap Zirhtu Saya/ma Ni (World Teacher’s Day) sunloihnak an tuah ih Area level in Ngan Ca Mawi zuamawknak khal tuah a si.
“Primary Level ah 1st & 2nd, Secondary Level ah 1st & 2nd tin laksawng le capi cu Area (7) ah pek theh an si ih Tertiary Level ah cun Biazai, Ngan Ca Mawi, Nun Thu Leng, zuk suai le zuamawknak pawl thawn World Teacher’s Day hrang zuamawk nak a um ih, Peng huap in 1st, 2nd & 3rd laksawng pek a si ding” tiah Fimzirnak Department Secretary cun The Rihli Voice ah a sim.
World Teacher’s Day sunloihnak tuahnak tlawng pawl ah cun zirhtu pawl cu tlawngta pawl in upat peknak an nei ih nu le pa pawl in thlacam sak nak an nei. Cui’ hlei ah hla, lam le action song pawl thawn entertainment tuahnak caan khal an hmang tiah theih a si.
2022 kum Leitlun huap Zirhtu Saya/ma Ni hrang UNESCO ih thulu ret mi cu “Fimzirnak hmuihmel thlengawknak cu zirhtu pawl ihsin a thok” (The transformation of education begins with teachers) ti a si ih Myanmar ram National Union Government, Fimzirnak Ministry ih 2022 kum Leitlun huap Zirhtu Saya/ma Ni thulu ret mi cu “Harsatnak lak ah Dothlengnak tuahtu, sunloih le zohthimtlak CDM Zirhtu Saya/ma Pawl” (“Noble CDM Teachers in the Daring Revolution”) ti mi a si.