Thu Hmai Hruai
Minung kan si cun zovek khal in Pasal tha, Nu tling tha, hnatuan tha, ngaihzawng tha si thei ding zokhal kan zuam cio. Mipa pawl in an nuntu khawsaknak ah nunau a tul bangin, Nunau khal in mipa an tul ve. Asinan veihnih khat ahcun an rem awlo theu. Curuangah pakhat ih an nungcang a ziaza, pakhat sawn in a theihthiampi a tul. Himi cabu sungah mai hrang le khatlam hrang ruatin bangran zetih kan ruah theinak dingle a hnget khoh mi pehtlaihawknak kan neih theinak ding hrang theih tulmi tete pawl kan zir khawm ding.
A Sungthu Khaikhawmnak Mipa pawl cu zawnruatnak an neilo, mipa pawl cu an mai tanghmai hrang lawng an ruat, mipa pawl cu an thinlung ih an ruahmi tuah an hmang timi pawl hi nunau lam ihsin mawhpuhnak kan theihtam zetmi a si. Hivek ih kan mawh thluk awknak hi a dik maw? Himi cabu ngan tu “Steve Harvey” cun hivek ih mawhthluk awknak hi a cohlang theilo ih ziangruangah mipa pawl ziaza, hivek in an nei timi sawn hi a sim fiang. Himi cabu cu nunau pawl hrangih mipa pawl ziangvek in ruahnak an nei timi hailangnak cabu pakhat a si tin sim theih a si.
Cangantu amah rori a tonteh mi zalam tluan pawl tarlang a si. Cangantu Steve Harvy hi capoh ih lemcang a sivek in, zunknung ih cangtu khal a si. Nu le Pa karlak (Relationship) thawn pehpar mi capoh thawn komkhawm in a ngan mi a si ih hlawhtlinnak tampi a hmu. Himi cabu sungah Nupa karlak ih hrial a theih lo mi Pu (Nupi pa) thawn buainak, Nupa karlak ih uire san buainak pawl ziangtin kan cingfel ding timi pawl kan siar ngah ding a si. Act like a Laday, Think like a Man Cabu Tawitawifamkim cu Bung 3 then in kan tarlang ding.
Bung 1nak Mipa pawl ih lungput
Bung 2nak Tisa nuamnak hrang lawng a tuartu
Bung 3nak Hrial a theih lo mi buainak
Bung 1nak Mipa pawl ih lungput
Himi bungsung ahcun mipa pawl ih lungput a tlangpi pawl kan tarlang ding. Mipa tlangpi in “Kei hi zo ka si, ziang ka tuah ding, ziang ka tuah thei” timi phun 3 hi a tlangpi in an sut aw theu. Cabu ngantu Steve cun a tlun ih thusuhnak phun 3 a letaw thei lo tu mipa pawl cu an mah le an mah zianghman si lo vek in an ruat aw a ti. Mipa pawl hi kum 20 an hung kim cun nuntu khawsaknak hrang ruah a hung tul. Steve cun an tonteh mi thawn hitin tahthimnak a pe. Steve hi kum 20 a ti ihsin College ihsin a suak. Cutin a hnatuannak Ford Company khal in hnatuan an suah. Cumi caan ahcun sumpai khal a nei lo, hnatuan ding khal umlo in harsa zet in a um. Zaan khat cu capoh a ngan ih a kuat theu mi nunau pakhat in khawpi sung ih capoh tuahnak hmun ah capoh tuah dingin a rak sawm.
A hmaisabiknak a si vekin tih le khur phah cingin an sawmnak hmun ahcun mipi pawl a va awi. mipi pawl in an rak duhzet ruangah cumi zaan ah $ 50 a ngah. $ 50 timi cu a tamlo nan a harsat lai tak ih a ngah mi a si ruangah a lung a awizet ih thangzang khal tampi a ngah. Mipa pawl cu hivek in an nuntu khawsaknak hrang a tak ih an tuansuak lawngah an mah le mah zumawknak an nei vivo. Asinan kum zabi 21 hnu ahcun nunau pawl hi a hlan hnak in hna a tuan thei vivo sawn ih mipa an rinnak (an thumawknak) a mal vivo.
Mipa pakhat cu sum a hawl thei lo ruangah inn ah um in nui tuan a rak tuan asile cumi ihsin an mah le mah a zumawknak a tumsuk thok thlang. Mipa pakhat timi cu an mai duh mi parah sumpai lawng si lo in, duhdawtnak, zohkhennak le hnangamnak tiang pek an duh. Hivek tik cu caan ah nunau pawl khal in mipa pawl ih ruahnak an theih thiam pi a tul.
Mai pasal zianghman ih siar lo, hmuhsuamnak tongkam thawn kan biak asile buainak nasatak a suak ding. Mipa tam sawn tlangpi hi nupi an neih hlan fala tlangval an si lai, zuk le hmawm, ei le in eitlang ih vah, a leng suahvah hi mipa pawl in mi an sawm sawn. khi vek caan ah nunau in keimah sumpai ka neive kei mah te ka pe thei, midang rin tul lo tivek ih ti a thalo. Ziangtluk in sumpai na nei khal le mipa pekter ding.
Mipa tlangpi hi an duh mi an fala an nupi pawl an somdawl thei a si ahcun an thin hna a ngam. Neih awk hnulam khalah mah le mah a duhaw tu ngaingai pawl cu an hawlsuah mi sumpai hmuahhmuah fangkhat hman tanglo in an nupi pawl an up theh. an Nupi pawl an tulsam mi pawl khal theitawk tuahsak dingin an zuam. Mah le mah duhdawt aw tu taktak cu rilrawng in a ret aw dah lo ding. Hivek pawl cu mipa pawl ih thisen sungah a ciah aw cia. Curuangah ziangtluk ih thiam, hawl thei nunau in hivek ruahnak hi an theih thiampi a tul.
Bung 2nak Tisa nuamnak hrang lawng a tuartu
Himi bungsung ahcun duhdawtnak (Relationship) a thok hnu ih a cangtheu mi tisanuamnak hranglawng tuartu pawl ih buainak kan tarlang ding. Nunau tampi duhdawtnak thawn pehpar in an tongtheu mi buainak pakhat cu kumkhua um tlanglanta lo ih, tisa nuamnak hranglawng a tuartu buainak a si.
A thoknak ahcun ka lo duh bik, nangmah lo duh mi dang ka nei lo, ka lo nei kum khua ding tin a rak thok theu. Asinan tisa nuamnak hman theh hnu ahcun tlansan, tansan a tuartu nunau tampi an um. Cuti asile nunau pawl hrang ahcun kan hnen ih in ra naih hrethrotu mipa pawl hi tisa nuamnak hrangah maw? Kumkhua ih kutkai aw tlang ding kan si timi hi an thliar thiam a tul.
Himi zawn hi cangantu cun nga kaih dan thawn hitin tahthimnak a pe. Mi pakhat nga a kaih tik ah tumtahnak pahnih lawng a nei. Nga kaih hi nuamnak phunkhat vek ih a ruattu le a ei duh ngaingai ruangih nga kaih timi lawng a um. Nga nuamnak ih a kai pawl cu an kaih theh tikah an kaih mi an zukpi, rualpi hnenah an uaraw theh in nga cu an thlah sal theu. Nga a ei duh taktak tu pawl cu an kaih mipawl cu inn ah an thlun ih, an tifai hnuah tha ten ei theih dingin an suang.
Himi tahthimnak ah mipa pawl cu Nga sio tu an si ih, nunau pawl cu kaih a tongtu ding Nga vek an si. A thok ihsin nuamawknak hranglawg ruat ih mipan tu cu kumkhua kutkai aw tlang dingih ruah a har zet. Mah lam ihsin ziangtluk awkam tha, ziangtluk in rawl thaw suan khal asile nuamawknak hrang lawng a ruattu cu nuamnak lawng a ruat thotho ding. hivek mipa pawl cu hla ral ihsin kan thliar thiam a thupi zet. Asinan mipa then khat pawl cu nuamnak lawng siloin, kumkhua kutkai tlang ding khal ruat mumal lo in mi an ra pan thei.
Tuitum ahcun nunau ih cangvaih dan, a tong kam ih zir in, nuamnak hrang lawng ka kai ding maw? ei ding a tlak ngaingai maw timi thu then theinak nunau hnenah a um. Nunau ih tongkam le cangvaih dan ihsin mipa hnen in ziangmi a ra ding timi theih a theih mai. Curuangah kum khaw hrangah maw, a langte hrang timi cu kan mai par ah a thum aw timi kha hngilh hlah. Hivek caan ah mipa pawl ih zah kai dingin kan um thiam a thupi. Mipa pawl ih zah ding tlak in kan um asile kum khua hrang kan hril ngah thei ding. Mipa pawl ih zah kai tlak si dingin kan mahte daan kan neih a tul. Tahthimnak ah “Zaan nazi 10 hnulam cu in rak call nawn hlah aw tivek, cuti silo le kum khua ih ka kop lo dingmi thawn sex hman ka duh lo tivek khi neih a tha.
Hivek daan tete kan simsuak asile tisa nuamnak lawng ruattu cu an tlan dingih in duhdawttu ngaingai pawl lawngin daan kan tuah mi an thlun ding. Himi cabu ngantu cun mipa pakhat ih zah a kai lo mi nunau le mipa pakhat ih zah a kai mi nunau thu khal kauzet in simfiangnak a nei. Cumi sungah a thupi mipawl kan hril suak in kan tarlang ding.
(1) Mai taksa mawinak hlo lo ih langter in le, mi zoh rem lo ding tiang ceiaw cuanglo mi nunau cu kaih a tong dingmi nga vek an si. Sexy tuk, hot tuk ih cei aw ding lawng ruattu pawl cu tisa nuamnak hrang lawngih kaih mi nga vek an si.
(2) Mai duh mi mipa le a Nu le a Pa pawl ngamtak le tihzah tak ih a biak theitu nunau pawl cu kumkhua ih kaih dingmi Nga vek an si. Mipa ih nu le pa sungle khat pawl biak ngam mumal lo nunau pawl cu tisa nuamnak hrangih kaih dingmi Nga vek an si.
(3) Hni siamsi, mithmai pante ih a um thei ringring tu cu kumkhua ih kaih dingmi Nga vek an si. Mithmai ti piaupiau le me remrem pawl cu nuamnak hrang kaih dingmi Nga vek an si.
(4) Mi rinum mi pawl cu kumkhua ih kaih dingmi Nga pawl vek an si ih, a tha sawn deuh ding tiih a dawi rero tu cu nuamnak hrangih kaih dingmi Nga vek an si.
(5) Mipa pawl ih hnatuannak thei thiamtu pawl cu kum khua kaih dingmi Nnga vek an si ih Hmannak ding lawnglawng ruattu le a lut mi hmuahhmuah hmang rero tu cu nuamnak hrang kaih mi Nga vek an si.
(6) A leng fehtlang tik ah sumpai pek ding sup hmang le tongaw ding tiih a caan bi-khiah ih thleng thei lo pawl cu nuamnak ih kaih mi Nga vek an si ih, eiin hrang sup aw lo ih ong aw zet le caan bi-khiah ih a thleng vervo tu cu kum khua kaih dingmi Nga thawn an bang aw.
Fala le Tlangval duhdawtnak an thok tik ah a malbik ni (90) tal zoh aw in neihawk ding thu rel sehla a tha tin cangantu cun forhfialnak a nei. Hivek ih zoh aw lai caan ah mipa ih a hnatuan, a lungput pawl zirciang ih thu thencatnak tuah ding a si. Himi pa hi hmailam caan hrang tumtahnak a nei maw, biaknak lamah pum pe aw a si maw? a ziaza a tha maw tipawl zoh a tul. kan mai par ah zingtin in hmu kan um tlangtik ah zingtin na um a nuam maw ti pawl sut hlam aw. Hitin na tuah asile kumkhua umpi tlak a si maw timi na ruat thiam ding.
Bung 3nak Hrial a theih lo mi buainak
Himi bung sungah cun hmailam caan hrang kan hril theh hnu, kan ton dingmi buainak le cui buainak pawl cu ziangtin kan cingfel ding timi pawl kan tarlang ding. Inn sang pakhat asilo le kan duhawk hnu (uarawk hnu) hnu ih a tlangpi thu ih a ra suak mi buainak cu mipa in a duhdawtzet mi a hringtu Nu a duhdawtnak hi a si.
Hivek mipa pawl cu Ma Ma Boy tin an ko. kan falam tong cun Nui fa duat si pei cu! Nui faduat pawl a tlangpi thu in Nu le fa ih ngaih zawng, silole Nu le Nupi karlak buainak neuhneuh a suak theu. Hivek buainak cingfelnak ding hrang a thabik mi lamzin cu buainak pawl phorhsuak theh ih ruahawk khawm ding hi a si. Kan mah in duhdawt taktak tu mipa an si ahcun nupi hrang khal rem, Nu hrang khal rem dingmi lamzin an hawl ding. Ni le Rang thawn remawk lonak mai pasal in a thei pang ding tin thinlung ih pai ringring a tul lo. Hivek ih ruahrel khawmnak neih caan ah kei le na nu na duhduh hril aw tivek tongkam hi veikhat hman hman lo ding. Ziangahtile a nau hak lai ihsin ziangkim a tuah saktu, a zun ek tiang tuam hlawm saktu a nu a si.
A taksa parih a luang rero mi thisen pawl khal hi a nui thisen a si. Curuangah Nufa karlak ih a um mi duhdawtnak hi inn sang nu dinhmun in va zuam tum hlah aw. Nufa karlak buainak thu na tel paih lo thu, Nu le Pa – fate karlak duhdawtnak le Nupi duhdawtnak ih zuam na paih lo thu na pasal fiang dingin sim aw. cumi theh hnu lawngah na buainak thu ruah aw. Buainak pakhat a um leh theu mi cu mipa pawl ih uire mi buainak a si. Uire timi hi a tam sawn ahcun nunau ai mipa par ah a tam sawn. Inn sangpa an uire ti nupi pawl in an theih ahcun Hell ram ih tlavek in nupi pawl an tuar.
Curuangah Nunau pawl in ziangruangah pasal pawl hi an uire? An uire lo dingin zing tin ka kham thei ding timi hi a theih a tha. Nunau pawl cun sex thu hi duhdawtnak thawn kom khawm in thukzet in an ruat. mipa pawl cun sex thawn pehpar mi hi zangkhai tak in an ruat. Inn kan tlung kei kan kholh sal dingih a cem si mai tin an ruat. Curuangah an thinlung sungah duhdawtnak timi a hran, sex khal a hran tin an ruat theu. Mipa hrangah cun sex timi cu a lenglam lawng a si ih sunglam ih ruat ding phun khal in an ret lo. Mipa tam sawn pawl cu an mah hnak ih no deuh nunau pawl in an uar tik ah si tiuk in an ruat aw ih an porh aw zet. “Kei hi nupi innsang nei ka sizo nan fala pawl in in rak uarlai thotho” tin an porh aw.
Himi hi mipa pawl ih dinhmun derdar thok tertu khal a si. Asinan a Nupi, fanau inn sang duhdawtnak cu khatlam, a dang fala thawn sex thu ah khatlam tin an ruat theu. Fala dang thawn taksa lam ah nuamzet in an um ko nan a thinlung ngaingai ahcun inn ih a tan mi a nupi hnen lawngah a um. hivek mipa pawl cu “Ka kiang nai ah fala nonal tete ka ret ko nan ka thinlung cu ka nupi hnenah a um” ti aw pawl an si.
Pasal pawl kiangih nupi an um lo caan ah mipa tamsawn cu an uire theu. Tahthimnak ah inn sang nu cu hnatuan thawn tu le tu khual tlawng tivek caan ah inn ih pasal an uire caan a tam. Mipa timi cu sex tel lo in reipi an um thei lo. Nupi khual tlawng ruangah inn lam thil tul mi, fate thil tul mipawl khal mahte tuah theh a si tik ahcun thinlung phur a rit, mai duh mi khal pek aw thei lo an si ahcun nunau dang hnen tangdang kai a ol te. Inn sang pa pawl an uirenak dunglam ih thu pakhat um leh mi cu Inn sang nei zo mi cohlang thei tu nunau/fala tampi an um ruangah a si.
Ngaingai ahcun nunau hmuahhmuah in nang cu “Inn sang na nei zo. nang thawn sex kan hmang thei lo” tin an el sehla mipa zo hman uire an um lo ding. Inn sang nei le nei lo timi cu bumawk ol lo zet mi a si tik ah Nunau tam sawn cun ka itpi mi hi inn sang nei le nei lo an thei tlangpi. Asinan thenkhat nunau pawl cu an thinlung duh mi kim ter ding lawng an ruat ih inn sang nei, an si le si lo kha an ruat theu lo.
Curuangah hivek nunau pawl hi mipa pawl ih bat mi ah an cang ih uire nak khal a tam vivo. Inn sangpa a uire ti inn sang nu ih a theih tik ah mah le mah mawh phutnak, tah aihramnak a tuah awk lo a tha. hivek caan ah a pasal cu a mai duhnak ih zalen zet ih feh ter lawlaw ding maw a zate ngaithiam lawlaw ding timi pahnih lawng a um. A tuah mipawl na ngaithiam thei lo lawlaw a si ahcun then thop mai aw. Asinan na ngaithiam thei ding asile lehhnu ah cang nawn lo dingin remnak tuah aw.
Na ngaithiam theilo lawlaw asi ahcun kop awk nawn lo a tha. A tuah mi ziangkim mithlam ah a lang ih, thil tha a tuah khal a si le thinhengnak lawnglawng ih zoh, khui a feh khal ih a fehnak na sut ringring a si ahcun a thin a heng dingih hmaisa vek in a sual lala tengteng ding. In duhdawttu mipa ngaingai cu kan mai lam in kan ngaithiam ih remawknak kan tuah a si ahcun sual nawnlo dingin a mahten a remaw vivo ding.
Thunetnak
Mipa pawl cu an nuntu khawsaknak hrang lawng ruat ih an tuan tik ah veihnih khat nunau ruat lo vek in an um thei. Cun mipa pawl cun an duhdawt mi an mai zohkhen an duh ih cuvek ih an tuah thei lo le an thinlung a nau theu. Mipa timi cu nunau pawl nuamnak men ih kop hmang an um ih kumkhua hrang kopduh mi khal an um.
Asinan nunau pawl ih let dan (answer) dan ih zir in nuamnak ihsin kumkhaw hrang a cang thei ih kumkhua hrang tin ruat mi khal nuamnak men ah a cang lan thei timi kha hngilh hlah. Nunau lam ihsin pehtlaihawknak neih hlan ihsin tha te ruah a tul vek in leh hnu khal ah khatlam khatlam zoh ih tawlrel thiam a tul. pehtlaihawknak a that lo tik ah tongkam, um dan le ruahnak pawl cu thleng ta hrat in a tha sawn mi lamzin kan hawl thiam a si le ziangkim a rem that sal thei.