BOMB DAITHLANG LO TE’N
Salai Lianpi
Min Aung Hlaing ruangah kan theihnel dah lomi khal kan zir in kan theih a tulmi a tam vivo. Cumi lak ah kum reipi tiang harsatnak in petu ding bomb hi a si. Ral hi a daih cun meithal awn cu a reh cih ding nan bomb kammi hi cu kum 20, kum 50 hnu khal ah mi a siatsuah thei lai thotho. A puak thei lai thotho. Curuangah bomb hi kan ralring natsat a tul. Rampi ral rei le bomb kammi a tam pei ih siatsuahmi a nei tam sinsin ding.
Falam peng sung ih kan fimkhur zual tulnak hmun pawl cu Falam ralkap len kiangkap pawl, Vaar camp kiangkap, Tuphei ih ralkap camp hlun kiangkap, Tibual ralkap camp kiangkap, le Rih, Tio ralkap camp hlun kiangkap pawl ti sehla a sual lo ding. Cun raldoawknak hmunhma hlun pawl le zinpi le pumpelh zin te pawl hi fimkhur zet in kan zawh a tha. Cun Taingen ralkap camp hlun umnak pawl le lamzin kap pawl. Khualtlawn sukso tikah zinkap ah zun thawh le dailen hi hrial thei sehla, khua thlen lawngah zun le ek tlan sehla a him bik ding. Lamzin feh lai ih zun ek kan tlan duh pang si khal le zin kap tuk ahcun feh lo sehla, leivawr le electric hri tivek kan hmuh pang le ralring hleice cio ding ka lo fawrh duh.
Bomb kammi pal ngah ruangah 2021 in 2024 kum May thla tiang Chin ram ah mithi 36 an um ih kutke kim nawn lo minung 66 an um zo. Mithi pawl lakah nunau le nauhak hi zatek 40 an si. Curuangah kan fa le te pawl hi nulepa in bomb thuhla kan sim rero a tul. Nauhak hi an leknak ah kerkawm ih thil hmu theizet an si ruangah thir hlum, pipe rit deuh pawl le sarang (plastic) dum ih funmi pawl nan hmuh pang le nan tham lo pei tin sim le zirh aw uh. Zuk rori hmuh in kan sim thei le a tha sinsin. Cun khawtlang khal in hivek poimawh cakkhai kan ton tikih thi put tam lo ding ih tuamhlawm awk dan tivek zirhtu a sawm hna thiam uhsi. Kan dung June thla thok ah Paletwa ah nauhak pawl in bomb an sarih cumi thawn an lek tikah a puak ih a hmun ah an thi hai.
Bomb le kuttum tia ih hlum, kut zaphak tia ih pheng hlum tivek in a phunphun a um tikah nauhak hrangah leknak awm zet a si fawn. Cun nikum lam khal ah Tamu pengah Naa khal lai nauhak pawl in RPG mu (Tampaw vek) puak hrih lo an sarih cumi thawn an lek tikah a puak ih an thih phah. Kan dung te khal Vaar kiangah SAC ralhrang pawl an rak kammi bomb a puak ih pacang pakhat in mual in liam san lala. A poi ngaingai, Hawl ih phawrh thluh thei ci le si fawn lo. Curuangah bomb hi ral a daih hnu hmanah minung a siatsuah rero theitu a si tikah lo, hramlak feh tikah kan ralring cio pei uh ti’n ka lo sawm.