Kumthen Puai ni tlangzarhnak • Mualtlang thianfainak • Eidin pawl timlamnak
By Salai Thian Nei Thang
Kumthen Chin Nunphung Puai le Tuah Ding Ni Thuthannak
Kumthen Chin Nunphung puai cu, tlang le hawrkuam umnak danglam hman sehla, mah le umnak tlang le hawrkuam hmun ihsin, khuasen zaten hmunkhat te ah, duhdawt awzet le lungrual awzet ten an rak hmang tlang thei asi. Asan cu khuahlan Chin Pipu pawl cun thlawsuah petheitu ti in ruahsannak Pathian pa(3) an nei. Cupawl cu van ih a zammi Khawzing Pathian, Leitlun ih a ummi Khawzing Pathian le Leihnuai ih a ummi khawzing Pathian asi.
Cui Khawzing Pathian in thlawsuah a pethei ih ansia khal a pethei. Kan thih tik khalah kan thlarau cu anmai hnenah a feh ve tin zumnak an nei. Cui an zummi le an ruahsan mi Khawzing Pathian hnen ahcun kumtinten tihzah Upat peknak khawsen zaten Lungawi thusim(thawinak) le Thlawsuah thar dilnak pawl an nei theu asi.
Atlangpi thu in cui khawsen zaaten Nunphung Puaipi tuah ding ni tikcu caan cu Thlathul zan a thlenhlan karkhat/hnih a duh tikah khawsung ihsin Puithiam sangbik a silo le Khualal in, cumi ni ah Puai kan tuah thok ding tiin, thuthannak a nei. Ni ziangzat sung kan tuah ding timi cu khuasung ihsin Puithiam Upa, Hrinthek(clan) tiih Upa le Khua Upa pawl cun khuahlu tlang (mualtlang) ah an kai ih cuihmun ihsin reltlangnak an nei hmaisa ta.
Cuhnuah an nemhnget asi. Cui raithawinak tuah ding le can hmandan ding thuhla pawl cu Thlathul zan a thlen hlanah khuasung ihsin Puithiam cun khuatlang ah thu a than ih cutiin tlangzarhnak an nei. Hmun hrekkhat ahcun Puithiam upa sungkhat unau pawlih an sian hnu lawngah thuthannak an nei theu. Cun cui kumthen Nunphung Puai sungah zohman in mai lo hnatuan, le khual tlawng sukso vaak san hnuaihni lo in um an zuam cio.
Kumthen Chin Nuphung Puai le Timtuahnak
Hi nunphung puai cu Minung bulpaak pakhat thawn lawng a pehpar mi puai a silo vek in, khawsen zaten thawn a pehpar mi Nunphung Puai asi. Zapi ta khal si. Ahleice in Nunphung Puai hrangih a tul mi Laifaang, Vainim, Lai Zupi, Vok, Sia, Sang(Laisang), Pawnghut tivek khal Khuasen Upa zaten tongaw khawm hmaisa ta in, an hawl tlang. An zoh tlang.
Cun Puai tuahnak ding hrangih an tul mi innzuat rannung pawl khal kumthar a thlen hlanah an vulhcia thepthep theh zo. Chin Numi pawl khal cu anmah le tithei tawk cio in, senpi hrangah zanthing an hawl. Sum an deeng. Sang an tuah. Tidai an khai, mah le innsang cio khalah thianghlimnak nasazet in an tuah. Mipa pawl cun Numi pawlih tuah thei lo mi Puai sungih an hman ding mi meifar an hawl. Khuai an hawl.
Khuaibu an la. Cun khuang le dar pawl an rem. Tha ten an khawlhfai. Cutiin Numi/Mipa thleidannak um lo ten an mah le titheinak zawn cio ah upat awton le bawmawton in timtuah cianak pawl an rak nei asi. Cun khawsung tlangsuak Upa pawlin, Tlang an au ter ih an mah le neihmi khua le ramsung cio ah lamzin thianfaihnak nasazet in an rak nei.
Khawsung le Khawpawn lamzin pawl khal asia umnawn lo dingin an rem tha theh. Cun Lamzin kap ih a ummi zanthinghnah le zanthing pawl khal lamzin feh tikih hnaihnoknak um lo ding ten an sattan theh. Cun Cong le Lam(Khuangcawi) puai an tuah tikih Mualtlang(mual) an kai theunak khawhlu tlang Cawlhhmun pawl khal thianfaihnak an nei.
Culeiah khawsen ih inti laaknak dawhhna, veng dawhna le tiidai laaknak lamzin pawl khal thianfaihnak an tuah theh. Khawsung/khawleng le Innsung ih zoh a rem lo tiih an hmuh mi a zaten an remtha theh. Cutiin Thlathul zan a thlen hlanah nasazet in timtuah cianak pawl an rak neicia theh asi.