Furpi ih a cang tammi sungdok natnak ziangtin kan kham thei ding 
Tuisun ih kan reltlang dingmi cu boruak thlengawk caan, a bik in furpi caan ah a cang theu ih, mi tampi ih nunnak hringhro ttheu tu sungdok natnak thuhla asi.
Sungdok natnak hi upa,nauta ti lo in pakhat le pakhat suanawk ol zetmi natnak a si. Sungdok natnak hi ol ai te ah kan ruah men ih kan daitlan san a si ahcun nunnak tam pi kan sunral phah thei.
Cutluk ih tih a nungzet mi sungdok natnak kham thei ding in ahmaisabik ah,
1. Ziangruangah a cang
2. Ziang tin a suanawk thei timi kan theih a tul.
Ziangruangah sungdok natnak a cang
– Sungdok nat a suahter tu Bacteria timi nathrik kan rilpi/ kan pumpi sungah an luh ruangah
Ziangtin Sungdok natnak a suanawk thei
– A thiangfai lomi rawl (or) tidai ka ei/ kan in ruangah
– Kan ei/in (ti le rawl) a thiangfai ko nan kan ei/in mi ah sungdok nathrik a um ruangah, asilole kut baalpi thawn rawl ka nei ruangah
– Nathrik kaimi mina pawl ih hmanmi thil le ri thamnak ruangah
Sungdok nat hi furpi thok lam ah a cang tlangpi. Ziangahtile tthal caan ih baal/hnawm pawl kha furpi ruah in a fenh ih kan in mi ticawm/ ti dawhhna tivek ah a luanpi ruangah asi. Curuangah ticawm/ ti dawhhna pawl cu tidai thiangfai vek in a langh hmanah sungdok nat cangter theitu Bacteria nathrik pawl tidai sungah a um thei thotho.
Nathrik kai zo hnu ih fingkhawi/ tuamhlawmawk hnak in a hlankhan ih rak khamawk thiam hi a thupizet. A tanglam ih tarlangmi vek in sungdok nat cang lo ding in khamawk theih.
– Titoih ekinn hman ding.
– Rawl ei hlan, rawl khop hnu, ekinn feh ttheh tinten le ei in timlam hlan ah satpia thawn kut faiten kholh tengteng ding.
– A thiangfaimi haanghnah/rah le rawl hlumsa ei ding (a ttawtruaimi thingthei le haanghnah/rah ei lo ding).
– Tidai thaten suansauh ih in ding (or) tidai faiternak sii (Chlorine) hman ih in ding.
(Chlorine sii hman daan cu harhdamnak lam tuanvo neitu hnen suh a theih)
– Sungdok nat a tuartu ih hmanmi khuhkheng, khuat-hai, darhai le hnipuan pawl satpia thawn faiten kholh ding le mina thawn daiawk( tuamhlawm ttheh) tin ten kut satpia thawn faiten kholh ding.
Sungdok natnak pianhmang na tuar asile na tuar thok ihsin a tanglam daan pawl na thlun a tul
– Daithlang hrimhriim hlah.
– Na kiang naibik ih harhdamnak lam tuanvo neitu hnen ah arangtheibik in tuamhlawm awknak lak ding le an sim mi/ fial mi pawl tha ten thlun ding.
– Taksa hrang atul mi tidai (ORS, cencerh, ) pawl tampin in/ ei ding.
– Midang va suan bet lonak dingah titoih ekinn felfai ten hman ding le ekinn hman ttheh tinten satpia thawn kut fai ten kholh ding.