Kareni pawl ih lungrualnak pawl Chin mipi ralkap pawl khal in kan cawn a tul
Kareni le Chin ramkulh ih mipum zoh tik ah cutluk ih thlau aw tuk lo mi ramkulh pahnih an si. Kareni ram ah Phe khung le Moebee siar tel asile minung ting 4 hrawng an um ih, Chin ramkulh khal ah minung ting 5 hrawng lawng an um. Chin ramkulh hi Kareni ramkulh hnak in a let 3 tluk in a kau deuh sawn nan, tlang le hram lak in a khat. Kareni ram ah hrin hnam 7 an um ih, Chin ram ahcun hrin hnam 53 an um ve thung.
Kareni le Chin ih bangawknak cu miphun duhdawtnak lam ah an cithlah ihsin a tel cia tluk ti ding khop khi a si. Himi miphun pawl ih an caknak cu ramkhel thu lam ih an cangvaihnak pawl ah hmuh theih a si.
Kareni ramkhel thu le ral donak
Kareni le Chin ah hrinhnam ciar in, ramkhel lam hmuh dan an neih cio ruangah ralthuam kai pawl khal a dangdang an suak.
Kareni National Progressive Party (KNPP) cu 1948 kum, zalennak kan ngah hnu ih a rak ding hmaisa bik mi Kareni ralthuam kai pawlkom an si. Karenni People’s Liberation Front hi cu KNPP ihsin 1978 kum hrawngah KNPP ihsin rak suak tupawl an si. Kayan New State Party hi cu Kayaan miphun au aw timi thawn 1964 kum ah a hran ten ra suak mi pawlkom a si.
KNPP cu Kareni ram ah rak ding hmaisabik an si vek in, tonteh nei tam bik pawlkom khal an si. 2021 kum, ralhrang pawl in thuneihnak an lak lai ah National Cases fire Agreement (NCA) hmin an rak khen ve lo. KNPP cu an thazang a cak lo nan raldo theinak an nei ih mahte ding thei tu pawlkom an si. 2009 kum ah Karenni People’s Liberation Front cu ramri kil ralkap ah an her aw ih, Kayan New State Party khal Pyithusit vek in thleng danglam aw in an ding.
2021 ralhrang pawl in thuneihnak an run lak ihsin Kareni mino pawl cu KNPP pawl ih bawmnak thawn Kareni National Defend Force (KNDF) an run din. Karenni People’s Liberation Front le Kayan New State Party pawl cu ralhrang pawl ih ramri kil le Pyithusit an si lai ko nan KNPP le KNDF pawl cu do lo in bawmnak an pe sawn tiah theih a si.
Cutin ralhrang pawl in thuneihnak an lak hnu, Kareni ram ah KNDF an suah vek in, National League for Democracy (NLD) thazang caknak peng pawl ah PDF battalion 10 hrawng an hung suak. Hmin dang le ralthuam kai pawl khal an hung suak. Kareni ram ah Kareni National Progressive Party/Kareni Army (KNPP/KA) pakhat lawng a um ding tiah KNPP cun an tlangau pi ve lo.
Cuvek dinhmun ah Kareni dothelngnak sualtu mipi ralkap pawl, 2020 hrilawknak ih tlingmi hlutdaw palai pawl, khawtlang pawkom pawl tivek in ralhrang pawl do tu thazang pawl cun Kareni State Consultative Council ah an zaten an kom khawm aw theh. cumi ihsin Kareni State Interim Administration Council an din.
Ramri kil dinhmun ihsin ralhrang pawl do sal tu Karenni People’s Liberation Front le Kayan New State Party pawl khal Kareni mipi ralkap pawl thawn an tuantlang theh. Ralhrang pawl in Pyithusit ih an ruah mi Kayan New State party vek, tuini tiang lai lak ih rak um tupawl thawn khal buainak zianghman an nei dah lo.
Kareni ram ah a bangaw lo mi pawlkom pawl cu ramkhel thu ahcun tluktlang le bangran tak in an kom aw khawm ih, raldonak lam khal ah hmun khat ih an do mi hmuh a si. Kachin ram ah Kachin Independent Army (KIA) lo cu a dang ralthuam kai um a theih lo. Rakhai ramkulh sungah Arakan Army (AA) ti lo cu a dang ralthuam kai um a ngah lo tivek ih, a rak ti tupawl thawn cu an danglam lawlaw.
Kachin le Rakhai ahcun an mah le awm mawi mi vek in lamzin an hril kan ti asile Kareni ram khal ah an mah thawn rem aw dingmi lamzin an hril a si ve mai.
Kareni ram ah KNPP, KNDF, Kah lah lah htah, PDF tiin a mal bik ralthuam kai pawlkom 4 an um ih, hmun khawt ah relrem aw in tuantlangnak an nei. Kareni lailak acozah hnuaiah uknak lam pawl khal, khat le khat theih pi aw in, hna an tuan khawm. Kareni ram hi ngaingai te ti ahcun Federal ram ukawknak sungih Federal ram vek khi an si.
A bangaw lo mi pawlkom dang thawn buainak an nei lo ih, kom khawm aw ih relrem tluk vek an si. A bangaw lo mi pawlkom khat le khat, mah le mah karlak buainak nei lo in, thuneihnak zem aw, seu aw vek in an kom khawm aw ih, ralhrang pawl cu hmun khat an do tlang.
Chinram ramkhel thu le raldonak
Chin ramkulh sungah hrin hnam 53 an um tiah an sim ih, then khat pawl cun cumi hnak in an mal ding rak ti tupawl khal an um thotho. Hrin hnam an bangawk lo vek in, a bangaw lo mi tong dangdang khal hman a si. Chinland timi tongfang men hman ah Zomi lam cun an cohlang thei lo ih, an hman lo hleiah Zoland tiih an hman mi khal hmuh ding a um.
Chin National Front (CNF) cu 1988 kum ihsin an rak din thok mi a si ih, Chin ralthuam kai lak ahcun upa bik le tonteh nei tambik mi, pawlkom an si. CNF cu ralthuam kai ih ding, ralthuam thawn raldo dingih timtuah le zirnak, mi rak sawm tupawl khal an si ko nan 2021 ralhrang pawl in thuneihnak an lak tiangah ralthaum thazang tampi, an neih lo ih hleiah 2021 kum, ralhrang pawl in thuneihnak an lak tiang khal ah ralthaum thawn doawknak ngaingai an neih mi hmuh ding a rak um lo.
Ngaingai te ti ahcun Chin ralthuam kai, dothlengnak sual dingih Chin ramkulh sung ralthuam kai a ra suah ciamconak hi 2021 kum ralhrang pawl in thuneihnak an run lak ihsin a si. Thalpau dothlengnak ah Chin ramkulh cu pengtin, mah le hrin tiin ralthuam kai pawlkom 20 lenglo a suak.
A thok lam ahcun Chin ramkulh khal ah Interim Chin National Consultative Coucnil siseh, hmun khat ih raldo khawm dingah Chin Joint Defend Council pawl an rak din. CJDC sungah Chin ralthuam kai pawlkom 18 tiang an rak tel. Chin ramkulh khal ah a thok lam ahcun Kareni ram vek thotho in a bangaw lo mi ralthuam kai pawkom, kom khawm awknak nei dingin duh thu an rak sam. Policy an rak nei.
Asinan Chin National Army (CNA) sungah CDF pawl an rung lut asile thupek pakhat hnuaiah feh in dothlengnak khal hmual a nei sawn ding tiin CNF hruaitu pawl in an run ruah thok mi, 2022 kum cem lam ihsin hmuh a si. Aw khat, thupek pakhat hnuai ih kan feh asile kan fek sinsin dingih raldonak khal ah cak zet le ol ten kan ral pawl kan neh thei ding timi an hmuhnak, an ruahnak ihsin a ra mi a si ding tiih sim a theih.
2023 kum cem lamah CNF hohanak in Chinland Council an din ih, 2024 kum, February thla ah Chinland Council acozah khal an run din. ICNCC ihsin CNF le Chinland council cu an suak ih CJDF hantuannak pawl khal a rung hlo theh. CNF pawl hrang ahcun Chin ramkulh hrangah hmun khat te ah pawlkom le kaihruai awknak kan din ngah ding tiin an ruat tla a bang.
Asinan cuvek ih Chinland council asilole Central ih control theh awknak pawl, cohlang thei lo tu, lungkim pi lo tu pawlkom pawl khal an um. cumi pawl cu Zomi Federal Union (ZFU/PDF Zoland), Chin National Organization (CNO/CNDF), Chin National Council (CNC-CDF Mindat) pawl an si. Himi pawl cun Chin miphun hrang, ramkhellam, raldonak lam tuantlang nei dingin Chin Brotherhood an din thu 2023, December ni 30 ah tlangthannak nei in thu an run suah.
CDF Matupi brigade 1 pawk khal Chin Brotherhood ih an tel thu 2024, April ni 10 ah thu an suah. Cui an thu suah mi vek asile Chin Brotherhood sungah ZFU/PDF Zoland, CNO/CNDF, CNC CDF-Mindat, CDF – Matupi brigade 1 pawl hleiah Maraland Territorial Council (MTC/MDF), Chin Defend Force – Kanpelet tiin pawlkom 6 an tel.
Himi pawlkom pawl cun Interim Chin National Consultative Council (ICNCC) cu an thlun bet ih, an hnuai ah Chin Brotherhood tiin an ding. Chin ramkulh sungih dothlengnak sualtu mipi ralkap sungah CC/CG le ICNCC/CB tiin pawlkom pahnih a hung suak.
Cuvek asi tik ah a tlangpi thu cun CJDC sungih tel mi pawlkom 18 sungin pawlkom 12 pawl cu CC/CG sungah an tel ih a dang pawlkom 6 pawl cu ICNCC/CB sungah an tel tiih sim a theih. Matupi ahcun hmun hnih ah an tthek aw thung. Kalay – Kabaw ih cangvaihnak neitu CDF/KKG le CDF/CDM Siyin an tel lo asi le Chin ramsung ih hrambun mi pawlkom 10 cu CC/CG sungih an telnak hmuh a si. Cuitlunah 2020 hlutdaw palai pawl khal CC/CG sungah an tel.
A ram zawng ih kan zoh asile Hakha pengsungih Sur khua, Thantlang pengsungih Hnaring, Tonzang khawpi le Cikha khawpi, Falam pengsungih Rihkhawdawr, Matupi pengsungih Rezua, Lailenpi pawl cu CC/CG pawl in an control. Hakha le Thantlang peng khal CC/CG pawl ih cangvaihnak ram a si.
ICNCC/CB pawl ih an control zo mipawl cu Kanpelet pengsung ih Cindwe khawpi, Mindat pengsungih Magui Ingnuu le Matupi khawpi pawl an control theh. Tedim, Khai Kam, Mindat le Falam ram pawl cu Chin Brotherhood ih cangvaihnak ram a si. Cuvek a si tik ah himi pawlkom pahnih ih thazang le an ram humhual mipawl zoh tik ah an pahnih in buk aw tawk zet cu an si. Chin ramkkulh saklam ih Tedim le Falam cu ICNCC/CB pawl in an ciahneh ih, a dang ram pawl cu CC/CG pawl in an ciah neh. Chin ram thlanglam ah Mindat peng, Kanpalet peng le Matupi khawpi pawl cu ICNCC/CB pawl in an ciah neh ih, Matupi pengsungih Lailenpi le Rezua cu CC/CG pawl in an control thung.
Pawlkom pahnih karlak ih buainak hrampi bik
2024 kum, June thlasung ih cangmi Matupi doawknak ah Chin ralthuam kai pawkom pi pahnih karlak ah kahawknak tiang a thlengih thin nuam lo za ngaingai a si. Matupi khawpi sungih ralhrang ralrelnak hmun pi le battalion pahnih pawl khal lak theh asi zo nan Chin ralthuam kai pawlkom pahnih karlak doawknak a reh thei hrih cuang lo. Kyindwen le Matupi doawknak pawl ih tel tu AA pawl thawn pehpar aw in hmuh dan dangdang a um ko nan, buainak hrampi cu AA raungah a si lo.
Buainak hrampi bik cu Chin ralthuam kai pawl karlak siseh, Chin ramkulh sung khal ah siseh ziangtin kan kom khawm aw ding timi ah a si bik. Hmunpi ihsin control mi, Centralization do rero tu tlangpar hriam kai tampi pawl khal mah le ramkulh cio, mah le ram cio ah Centralization din sal an tum theh.
Himi pawl khal hi thu hlo lak men ihsin ra suak cu a si lo. hmun khat ah kan kom khawm aw dingih cutin kan thazang a cak asile ralhrang pawl neh ko kan do thei ding timi ruahnak ihsin ra suak mi a si.
Buainak pi bik cu thuenihnak central ih ret khawmnak le zapi kaihruaiawknak, thuneihnak zem awk dan pawl ah buainak cu a rak phum aw ziar. Tufang Kareni ram khal ah zapi kai hruai khawm awknak le thuneihnak tluktlang tak in an zem aw ih cutin an feh. Cumi ah tuini tiang Kareni mipi ralkap pawl karlak ah buainak pi cang rel ding tlak ngaingai hmuh ding a um hrih lo. kan rel ngaingai asile Central acozah hnen ihsin Federal la duh tu Kareni pawl cun an mai ramkulh sung khal ah Federal phung hmangin, thuneihnak zemawknak phun pawl an hmang kan ti thei.
Chin ramkulh sungih ramkhellam thazang pawl, mipi ralkap pawl hrangah Kareni ram ih an kai hruaiawk dan hi ruah tul zet mi a si. Kareni ram ah Interim Consultative council ihsin Interim Kareni Government ah an thleng ko nan zianghman buainak an nei cuang lo. Chin ramkulh ih an rak thok dan hi Kareni thawn a rak bangaw ko nan Centralization ih an thleng danglam hnu ihsin Chin ramkulh sungah buainak a suak thok.
Chin ramkulh sungah Matupi ih ralrelnak hmunpi Biuha le KLY 304, KLY 140, Mindat ah KLY 274, Hakha ah ralrelnak hmunpi le KLY 266, Falam ah KLY 268, Tedim ah KLY 269 pawl a um. Tu ahcun Matupi biuha le KLY 304, KLY 140 pawl an lak zo raungah Biuha pakhat le Battalion hmunpi 4 lawng a tang thlang.
Tu fang hi Shanram saklam, Kachin, Rakhai ramkulh pawl ih nasa tuk ih an doawk rero lai ah Chin ramkulh sung ih ralhrang pawl khal, rak humnak ding sullam sitte tiat hman a um lo. Cuitlunah a ram um tu dan, Geopolitic lam khal in Kareni vek in Nyipidaw direct ih hro thei tu ramkulh khal a si lo.
Cuti a si raungah Chin ramkulh sungah ralhrang pawl ol ai ten tahzang an bet aw thei lo ding. Curaungah Chin mipi ralkap pawl an lungrual bang sehla cu Chin ramkulh sungih ralhrang pawl thianfainak ding ah cutluk in a har tuk lem lo ding. Chin ramkulh hi ralhrang pawl um lonak ram ih tuah ding khal in a har tuk lo ding.
Curaungah Chin ralthuam kai pawl dinhmun in cui pawlkom pahnih karlak ih buainak pawl tha ten hliak hlai ih zoh sal dingah le Chin mipi ralkap pawl, komkhawmawk theinak ding hrangah pakhat khat cu an tuah a tul.
Matupi khawpi sungih ralrelnak hmunpi biuha le battalion pahnih rori lak fel a si zo ih, ralhrang pawl um lonak ram, rak si zo khal sehla Chin ralthuam kai pawlkom pahnih karlak buainak a suak bet timi cu Chin mipi hrang khal siseh, Chin ramkulh hrang khal ah that hnemnak zianhman a um lo. Cui dinhmun pawl a rang thei bik ih cingfel a tul.
Chin hrinhnam pakhat le pakhat bangawk lonak, danglamnak pawl theihpi awk a tul. A bangaw lo mi hrinhnam, ramkhel lam ih pawlkom dangdang pawl, kom khawmawknak ding hrangah Kareni, mipi ralkap pawl ih komkhawm awk dan hi Chin ram khal ah ruah tul zet mi thil a si.
Centralization duh lo raungih a kek kuai mi ram pawl khal ah thuneihnak zem awk phun pawl an hmangih, cuvek ih Federal phung an hmang khal hi a bangaw lo mi, pawlkom dangdang, mi a kom khawm ter thei. Duh um lo zet mi buainak pawl an hrial theh thei timi khal kan theih hngil lo a tul.