“Monkeypox’’ nat hi tulaifang leitlun huap nat tihnungzetmi le kilhim-awk ttulzetmi natnak a si tiin leitlun harhdamnaklam pawlkompi (WHO) in caakkhaitak in a phuang.
Monkeypox (Mpox) virus hi, 1958 kum ah Denmark ramih zawng (Monkey) hnen ihsin an hmu hmaisabik. Cun 1970 kum, Africa leilungtthen, Congo ramih nauhak mipa kum (9) mi hnenah natnak an hmu thok. Kan dung naite kum 2022, kum khat sungah mipum (15,600) luan nat an tuarih cumi lak ihsin mipum (537) cun nunnak an liam thu leitlun harhdamnaklam pawlkompi (WHO) in veikkhat a than dah.
Monkeypox nat hi pakhat le pakhat a suan-aw olzetmi natnak a siih, Africa leilungtthen, Congo ihsin Africa leilungtthen ih ram pawl a simi Burundi, Rwanda, Kenya le Uganda ram pawl tiang nat a karhzai vivo ruangah, natnak tihnung a si tiin August 14, 2024 ni ah leitlun harhdamnaklam pawlkompi (WHO) in veihnihnak a phuang sal.
Monkeypox nat a suan-awk theidan cu
Monkeypox nat a tuartu minung, ramsa le an hmanmi thilri dainak/thamnak ruangah
Monkeypox nat a tuartu thawn nupa sinak (sex) hmannak ruangah le
Monkeypox nat a tuartu thawn hmaitonte ih biak-awknak ruangah an si.
Monkeypox nat pianhmang pawl cu
Taksa ruangpum ah a senbol tumpipi, tidai le hnai a telmi abol a suak (Tthimnak; Hmai, Kutke, Kam, Kawng le taksa pum)
Tak saa (Fever)
Lu naa (Headache)
Taksa naa (Muscle aches)
Thacem/ Cau (Low energy)
Tthaltthoh (Swollen lymph nodes)
El naa (Back pain)
Himi natnak pianhmang pawl hi atlangpithu in nathrik neih thok ihsin ni (21) sungah a suak thei.
Monkeypox nat ziangtin kan kham ding?
Miburpi umnak hrial ding.
Natnak a neimi thawn biak-awk lo ding, dai-awk lo ding, an hmanmi thilri hman lo ding.
Satpia thawn faite’n kut kholh ringring ding.
Thil le ri thiangfai te’n ret ding.
Kaahuhnak (Mask) hman ding.
Natnak a neimi thawn nupa sinak (sex) hman lo ding.
Monkeypox nat nei tiih zumhmaimi pawl cu harhdamnaklam tuanvo neitu hnenah zohfel-awk lohli ding. Inn ah khal mahte a dangtein um ding. Midang thawn thilri hman ttawm-awk lo ding, dai-awk lo ding. kaahuhnak (mask) hman ding. Satpia thawn faite’n kut kholh ringring ding.
Crd : Chin Tele Health