Ralhrang tihnung lak tlunih a cangbet mi tilik (tilian) ihsin, ziangtin kan talsuak ding
Ralhrang tihnung harsatnak kumthum (3) luan lai kan tuar rero laiah, duh umlo zetin a ra thlengmi tropical storm”YAGI” buangbar thlisia ihsin ruahsurtuk nak ruangah leimin, tilian, tlang le lamzin min tivek pawl cu a ra cang hnu ni (5) rei hnu ah Inn le lo thilri sungralnak siseh, thihhlohnak tiang mi tampi in an tuarnak pawl cu social media ihsin khal ah kan hmuh cio ko ding.
Ni suahnaklam Myanmar ramsung Shan state ih Tachilek khawpi ah September 09, 20204 hrawng ihsi thokin September 11, 2024 ah Myanmar ramsung north-central Mandalay ramkulh lam khal September 16 tiang ruahpi nasa ten a sur tikah tikawng, lihawng, tiva pawl ihsin khawpi sung ah tilik tihnung harsatnak cun a nuai nasa. Cun Bago region (Pa khu ramkulh sung) Taungu khawpi leh Taungu nisuahnak lam sittuang tiva sir ih khawte pawl ah Inn le lo thlaicinnak pawl, minung nunnak tiang khal an tuar thu khal theih a si.
Himi thuthawn pehpar in ralhrang lam ihsin khal September 15, 2024 ah ca an suah ve ih cumi tiang ah mithi ruang (113), mi hlo (64) leh hliam hma tuar mi (14) tin an tar lang nan a takram ah mithi, mi hlo, hliamhma tuar pawl cu a cannak hmunpawl ih simrel dan ah cu hnak in a tamsawn an zum thu leh media dang dang ih sim rel dan thawn khal a bang aw lo ih media pakhat ih simdan ah Yametin pengsung lawng ah nununak liam (100) luan um thei dinhmun a si thu kan hmu thei. Shan state, kalaw khawpi khal ah mithi an um thu an tarlang mi thawn pehper in thuthang thenkhat ah (200) luan tiang an thithei an tin an Kalaw khawmi thenkhat cun ruak (12) lawng kan sar ih neta mi ziangzat an thi ti cu fiangten kan thei hrihlo ruang ah (200) luan an thi cu an zumhmang a si tin an sim. khaikhawm tikah ralhrang tarlangmi hnakin a tam ding a zum um.
Thlisia hrannak ruang ih Myanmar ram, nisuahnak lam Tachilek ah khal tidai ih fenthat an um vek in cumi hnu ihtilik tuarnak langsar deuhnak hmun pawl hi –
1) Northern-central Mandalay region : Mandalay khawpi, Pyawbwe, Yamethin, Kyaukse, Wundwin, Myittha leh Pyinmana.
2) Shan state-tachilek city leh kalaw city
3) Bago (Pakhu) region : Tuangoo le Phyu
4) Kareni state: Demoso hmun pawl ah thihlo a pehpeh in an um.
September 16, tiang ah thihhloh sunralnak nasaten a thleng zate kom in mithi 226, mihlo 77, Ramsa phunkim ting thawngkul (thawngkul-20) leh thlaicin mi Acreage ting 6 luan cu tilik in a khuh thluh. Tilik tihnung harsat tuarnak hmun cu pengtlang 56 a siih, Inn 2116 tluk a siatsuah titu le Inn 65000 luan a siatsuah titu khal an um.
Ralhrang ih ca an suahmi cazin zoh in siatsuahmi ziangtluk a tam ti hmuh a theih. Tui tilik thlennak hmunpawl ih a hrekluan cu Revolution hrang hriamkai kah donak hmun tete an si vekin ralhrang in ei-in, sivai lutsuak, Transportation lam an rak khambet nak a si hlei ah hiti vekin tilik ruangih mipi mangbang vangsang an lam hnu khalah an kham sunzawm bet lai ti a si.
Cui tlunah relief thilri an zemmi parah a zemtu le a bawm tu pawl hminsinnak la in inspection an nei bet lai hrih. Cun Pago region-sittaung river nisuahnak lam vek in Kareni state lam ih tulai boruak ih ruah tidil ti ralut ruangah umhmun thawnawk rero tu pawl Shan state-Phekon khawte lam khal ralhrang lamih an khamnak hmun a si vekin tilik harsatnak tuartu pawl cu bawmduh mengmang khal le free zetin bawm a ngah lo ti a si ruangah hithil khal hi riatsiat za ngaingai a si.
Cuvek laiah, ralhrang dinhmun in ramtin ihsin bawmnak an beisei ve ko nan China, India, Thailand Inhnen ram pawl leh Rusia lawng thawn a naimi pehtlaihawknak nei thiam ram in ziangtin leitlun pumhuap ram hmuahhmauh ih bawm cu a beisei ngam! A sinan ralhrang in tu le tu a dodal mi United Nations in teh ziangzat a bawm ding ti cu thuhla cipciar in theih a si lo hmanseh, Southern korea cun tilik harsatnak a tuartu pawl hrang tin $13 million bawm a tum thu a phuang. Tutakfang ih an tul zet mi cu lainanak thawn a phunphun ih Restoration kum rei a tul mi Inn le lo rannung pumcawmawknak le tundin awknak nasa ten ngaihtuah a țul ding sikhaw tufang Myanmar ram dinhmun in remthatsal a theih nawn tak kei maw ti cu ringhlelh um za ngaingai a si ziangruangah ti le a cu vek tuahthat le tundin lam hnakin hmundang tete pawl ah siseh, kahdo awknak a luar vivo hrih lai tikah a that sal remsal ding tilam beiseinak cu a thim hrih lai a bang.