Thakthak (ring worm) timi cu taksa a thaktertu fungus (paa) phunkhat ruangih a cangmi a si.
Taksa thak, a kapri a sen hluum a um ih a lai ah a rang vek a hlangh tete ummi a suak. A sennak zawn cu taksa dang hnakin a sahdeuh. Kheuh le a thak sinsin ih taksa sennak a kau deuhdeuh ih a karh vivo thei. Curuangah ring worm tin an kawhnak a si. Thenkhat cu taksa sen fate ihsin a sen bol tum ah a cang thei.
Ziangruangah a thak
Taksa ih um fungus ih suahmi enzyme phunkhat cun vun ih um keratin cell pawl a kuaiter ih vitamin vekin a ei. Hi thil cang ruangih a suakmi dat pawl cu taksa sungih um raldotu ih rak donak in allergic a suahter ruangah taksa a thak.
Zovek pawl hnenah a cang?
Thakthak (ring worm) hi mipa, nunau, upa, nauta ti loin a cang thei.
Atlangpi thuin thlan suak tam pawl, boruak tha lo a hnawngnak hmunih um pawl, rannung thawn dai-aw tammi pawl, mi burpi umnak ih um pawl (Thimnak; tlawnginn, mibur umkhawnnak hmun, thawnginn..etc.)
Mi cakvak lo thitha mal pawl (Thimnak; thi thlum/zin thlum nat nei pawl, steroid sii reipi a eitu pawl, cancer sii than pawl…) le
Taksa thianfainaklam daithlang pawl/ mi borhhlawh pawl
Thakthak (ring worm) hi zak, paang, luvun, kut le ke pawl ah a suak tam. A suahnak hmunih zirin an hmin a danglam.
A suan-awk daan
Taksa dai-awknak ruangah a suan-aw thei. Thakthak (ring worm) neimi ih hnipuan, a hmanmi thilri (Thimnak; Pavua, Lukham, Puan …etc ) pawl tawm-awk ih hmantlangnak in a suan-aw thei.
Thakthak (ring worm) neimi ramsa (Thimnak; Uico, zawhte…etc ) pawl thamnak khal in a suan-aw a thei.
Kham-awk daan
Taksa thiangfaite’n um ding.
(Faite’n kholh-awk ding, kut-ke tin tan ding).
A ro tha lomi/a hnawngmi hnipuan vei tampi hruk lo ding. (A hleice in bawngbite, angki sung hruk, lukham pawl a ro that hnu lawng ah hruk/hman ding).
A cangtheitawk in midang thawn hnipuan tawm-awk ih hruh lo ding.
Thakthak (ring worm) nei tiih rinhmaimi ramsa pawl ramsa siibawi hnenah hmuh ding.
Ke kha faite’n le rote’n ret ding.
Mizapi hman mi tileuhnak hmunih tileuh asile faite’n kholh-awksaal ding.
Tuanhlawm-awk daan
Thakthak (ring worm) nat nei ruangah ningzak ding a si lo. Thate’n tuamhlawm-awk a tul. Thakthak a umnak hmun kha faite’n le ro ko ih ret ding. Fungus ruangih a cangmi a si vekin antifungal timi sii hnih in tuamhlawm-awk a theih. A dam har asile siibawi hnenah zamrangte’n tuamhlawm-awk lohli ding.